អ្នកជំនាញរបស់អង្គការសហប្រជាជាតិកាលពីថ្ងៃពុធ បានទាមទារឲ្យមានការស៊ើបអង្កេតប្រកបដោយតម្លាភាពទៅលើការស្លាប់របស់មនុស្សដែលត្រូវបានឃុំខ្លួន នៅក្នុងប្រទេសបេឡារុស ពីបទសម្តែងការមិនពេញចិត្តផ្នែកនយោបាយ។

ដោយគ្រប់គ្រងដោយលោកប្រធានាធិបតី អាឡិចសាន់ឌឺ លូកាសិនកូ (Alexander Lukashenko) ចាប់តាំងពីឆ្នាំ ១៩៩៤មក ប្រទេសបេឡារុស បានហាមឃាត់គណបក្សប្រឆាំងពិតប្រាកដទាំងអស់ ហើយប្រឈមមុខនឹងការចោទប្រកាន់ពីបទធ្វើទុក្ខម្នេញក្រុមប្រឆាំង។

អ្នកជំនាញអង្គការសហប្រជាជាតិ បាននិយាយនៅក្នុងសេចក្តីថ្លែងការណ៍រួមថា៖«ក្នុងរយៈពេល ៤ឆ្នាំកន្លងមកនេះ បុគ្គលមួយចំនួនដែលត្រូវបានកំណត់អត្តសញ្ញាណ ដោយអ្នកការពារសិទ្ធិមនុស្សថា ជាអ្នកទោសនយោបាយ បានស្លាប់នៅក្នុងមន្ទីរឃុំឃាំង ឬស្លាប់ភ្លាមៗ បន្ទាប់ពីត្រូវបានដោះលែង»។

ពួកគេបាននិយាយថា អ្នកស្លាប់រួមមានមនុស្សដែលបានចូលរួមក្នុងការតវ៉ា ជុំវិញការបោះឆ្នោតប្រធានាធិបតីឆ្នាំ ២០២០ ដែលក្រុមសិទ្ធិមនុស្ស និងអ្នករិះគន់ បាននិយាយថា លោក លូកាសិនកូ បានក្លែងបន្លំ។

ការអំពាវនាវឲ្យមានការស៊ើបអង្កេតនេះ បានកើតចេញពីលោក Nils Muiznieks អ្នករាយការណ៍ពិសេសទទួលបន្ទុកសិទ្ធិមនុស្ស នៅប្រទេសបេឡារុស រួមទាំងអ្នករាយការណ៍អំពីសេរីភាពនៃការបញ្ចេញមតិ ការការពារសិទ្ធិ ក្នុងពេលប្រឆាំងភេរវកម្ម និងអំពី ការកាត់ទោសក្រៅប្រព័ន្ធតុលាការ។