តំណាងអចិន្ត្រៃយ៍របស់រុស្ស៊ីប្រចាំអង្គការសហប្រជាជាតិ លោក Vasily Nebenzya បានអំពាវនាវឲ្យអ៊ីស្រាអែល បញ្ឈប់អំពើហិង្សា និងដកការបិទខ្ទប់នៅតំបន់ហ្កាហ្សា។

លោកបាននិយាយនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាពមនុស្សធម៌នៅតំបន់ហ្កាហ្សាស្ទ្រីបថា៖ «គួរឲ្យសោកស្ដាយណាស់ បញ្ហាប្រជាជនប៉ាឡេស្ទីននៅតំបន់ហ្កាហ្សា មិនត្រូវបានកាត់បន្ថយទេ។ យើងមានការព្រួយបារម្ភយ៉ាងខ្លាំងចំពោះស្ថានភាព នៅតំបន់វេសបែង ( West Bank) ជាកន្លែងដែលកងកម្លាំងអ៊ីស្រាអែល កំពុងបង្កើនប្រតិបត្តិការរបស់ពួកគេ។ សកម្មភាពនៅទីក្រុងហ្ស៊េរុយសាឡឹមខាងលិច នាំមកនូវការបំផ្លិចបំផ្លាញទ្រង់ទ្រាយធំ ធ្វើឲ្យកាន់តែធ្ងន់ធ្ងរឡើងនូវវិបត្តិមនុស្សធម៌ និងដកហូតគ្រួសារជនភៀសខ្លួនអំពីក្តីសង្ឃឹម ដើម្បីត្រឡប់ទៅផ្ទះសម្បែងរបស់ពួកគេវិញ។ ការសម្លាប់ ភាពរង្គោះរង្គើ និងការរាយការណ៍ជាប្រចាំពីការសម្លាប់ជនជាតិប៉ាឡេស្ទីន ការរឹបអូសយកទឹកដី និងបំផ្លាញអគារជាច្រើន។ សកម្មភាពទាំងអស់នេះ គឺមិនអាចទទួលយកបានឡើយ»។

លោកបានអំពាវនាវឲ្យអ៊ីស្រាអែលបញ្ឈប់ជាបន្ទាន់នូវអំពើហិង្សា នៅក្នុងទឹកដីប៉ាឡេស្ទីន ធានាការការពារជនស៊ីវិល និងមិនធ្វើឲ្យមានការរំខានដល់ការដឹកជញ្ជូនជំនួយមនុស្សធម៌។ លោកបានជំរុញឲ្យបញ្ឈប់ការបិទតំបន់នេះ ជាបន្ទាន់។

អ្នកការទូតរុស្ស៊ីរូបនេះ បានសង្កត់ធ្ងន់ថា វិធីសាស្ត្របង្ខំក្នុងការដោះស្រាយបញ្ហាចំណាប់ថ្នូរ នៅតំបន់ហ្កា បានបង្ហាញឲ្យឃើញនូវភាពគ្មានប្រសិទ្ធភាព ហើយបានអំពាវនាវឲ្យមានបទឈប់បាញ់ជាបន្ទាន់ ជាមួយនឹងការសម្រុះសម្រួលពីតួអង្គអន្តរជាតិ និងការដោះលែងអ្នកជាប់ឃុំទាំងអស់។