ប្រធានាធិបតីម៉ិកស៊ិកលោកស្រី Claudia Sheinbaum និយាយថា លោកស្រី និងនាយករដ្ឋមន្រ្តីកាណាដាលោក Mark Carney បានឯកភាពគ្នាពង្រឹងកិច្ចសហប្រតិបត្តិការពាណិជ្ជកម្ម ជាពិសេសនៅពេលដែលពន្ធពីប្រធានាធិបតីសហរដ្ឋអាមេរិកលោក Donald Trump គ្រោងនឹងចូលជាធរមាននៅថ្ងៃទី ១ ខែសីហាខាងមុខនេះ ។

លោកស្រី Sheinbaum និយាយថា ពួកយើងទាំង ២នាក់ បានឯកភាពគ្នាថា វាចាំបាច់ក្នុងការគោរពកិច្ចព្រមព្រៀងពាណិជ្ជកម្ម USMCA ហើយពួកយើងបានចែករំលែកបទពិសោធន៍ពីលិខិតដែលពួកយើងទទួលបានពីលោកប្រធានាធិបតី Trump ។ ពួកយើងទទួលបានលិខិតជាមួយការទារពន្ធ ៣៥ភាគរយ ហើយពួកយើងទទួលបានលិខិតមួយច្បាប់ ទារពន្ធ ៣០ភាគរយ ។

លោកស្រី Sheinbaum បន្តថា លោកស្រី និងលោក Carney បាននិយាយពីយុទ្ធសាស្រ្តដែលប្រទេសទាំង ២ យកមកចរចាជាមួយរដ្ឋបាលលោក Trump មុនឱសានវាទថ្ងៃទី ១ ខែសីហា ។

លោកស្រីថា លោក Carney គ្រោងនឹងបំពេញទស្សនកិច្ចមកកាន់ប្រទេសម៉ិកស៊ិក ប៉ុន្តែកាលបរិច្ឆេតនៅពុំទាន់កំណត់នោះទេ ។

គួរឲ្យដឹងថា លោក Trumpបានផ្ញើរលិខិតជាច្រើនច្បាប់ក្នុងរយៈពេលប៉ុន្មានថ្ងៃកន្លងមកនេះ ដោយគំរាមដំឡើងពន្ធលើប្រទេសដៃគូពាណិជ្ជកម្មរបស់ខ្លួន ។

លោកបាននិយាយផងដែរកាលពីថ្ងៃពុធថា សហរដ្ឋអាមេរិកនឹងទារពន្ធ ២៥ភាគរយពីប្រទេសជប៉ុន ហើយពួកយើងអាចនឹងមានកិច្ចព្រមព្រៀងពាណិជ្ជកម្មជាមួយឥណ្ឌា បន្ទាប់ពីកិច្ចព្រមព្រៀងជាមួយប្រទេសឥណ្ឌូនេស៊ី ៕