នៅថ្ងៃព្រហស្បតិ៍ (ទី១៧ ខែកក្កដា) នេះ របបយោធាមីយ៉ាន់ម៉ាបានអះអាងថា បានវាយបណ្តេញក្រុមឧទ្ទាមប្រដាប់អាវុធដែលបានកាន់កាប់ទីក្រុងមួយ នៅជិតសាលាបណ្តុះបណ្តាលមន្ត្រីសំខាន់ៗរបស់យោធា បន្ទាប់ពីមានការប្រយុទ្ធគ្នាអស់រយៈពេលមួយឆ្នាំ។

ទីក្រុងដ៏តូចនៅភាគឦសាន គឺ Nawnghkio ត្រូវបានកាន់កាប់ដោយក្រុមប្រឆាំង កាលពីរដូវក្តៅឆ្នាំមុន បន្ទាប់ពីក្រុមផ្សេងគ្នាមួយចំនួន បានរៀបចំការវាយលុករួមគ្នា រហូតដណ្ដើមបាននូវជ័យជម្នះជាច្រើនលើកងកម្លាំងរបស់របបយោធា។ ទីក្រុង Nawnghkio មានចម្ងាយប្រហែល ៤០គីឡូម៉ែត្រ ពោលគឺចំណាយពេលប្រហែល ១ម៉ោង ពីទីក្រុង Pyin Oo Lwin ជាទីក្រុងដែលសាលារៀនមន្រ្តីយោធាដ៏ធំរបស់ប្រទេសនៅទីនោះ។

ការកាន់កាប់ទីក្រុងនេះ គឺជាជ័យជម្នះដ៏ធំមួយ សម្រាប់យុទ្ធជនជនជាតិភាគតិចមកពីកងទ័ពរំដោះជាតិតាអុង (TNLA) និងកងកម្លាំងការពារប្រជាជនគាំទ្រលទ្ធិប្រជាធិបតេយ្យ។ ប៉ុន្តែតាមរយៈប្រព័ន្ធផ្សព្វផ្សាយរដ្ឋ The Global New Light of Myanmar របបយោធាបានឲ្យដឹងថា ខ្លួនបានវាយដណ្តើមទីក្រុងនេះបានវិញ បន្ទាប់ពីមាន «ការប្រយុទ្ធគ្នាចំនួន ៥៦៦លើក ក្នុងប្រតិបត្តិការរយៈពេល ១១ ខែ»។

គួរបញ្ជាក់ថា រដ្ឋប្រហារឆ្នាំ២០២១ បានបង្កឲ្យមានសង្រ្គាមស៊ីវិលនៅក្នុងសហភាពមីយ៉ាន់ម៉ា ដោយរបបយោធាត្រូវប្រយុទ្ធជាមួយក្រុមទ័ពព្រៃគាំទ្រលទ្ធិប្រជាធិបតេយ្យ និងក្រុមប្រដាប់អាវុធជនជាតិភាគតិចជាច្រើន ដែលបានដណ្ដើមគ្រប់គ្រងយ៉ាងយូរលើតំបន់តាមព្រំដែនរបស់ប្រទេស៕