ទីភ្នាក់ងារគ្រោះមហន្តរាយរបស់រដ្ឋាភិបាលបាននិយាយកាលពីថ្ងៃព្រហស្បតិ៍សប្ដាហ៍នេះថា ភ្លៀងធ្លាក់ខ្លាំងត្រូវបានទាក់ទងទៅនឹងការស្លាប់ចំនួន ៥៤ នាក់ក្នុងរយៈពេល ២៤ ម៉ោងចុងក្រោយនៅក្នុងប្រទេសប៉ាគីស្ថាន ដោយបានធ្វើឱ្យចំនួនអ្នកស្លាប់កើនឡើងដល់ប្រហែល ១៨០ នាក់ចាប់តាំងពីការមកដល់នៃរដូវមូសុងកាលពីចុងខែមិថុនាកន្លងមកនេះ។  

ភ្លៀងធ្លាក់យ៉ាងគំហុកបានបន្តស្ទើរឥតឈប់នៅទូទាំងផ្នែកនៃខេត្ត Punjab ចាប់តាំងពីព្រឹកថ្ងៃពុធ     សប្ដាហ៍នេះ ដែលបណ្តាលឱ្យមានការជន់លិចទីក្រុង និងផ្ទះសម្បែង រហូតដួលរលំ។      

ក្រុមជួយសង្គ្រោះបានប្រើប្រាស់ទូកដើម្បីជម្លៀសក្រុមគ្រួសារចេញពីភូមិនានាតាមដងទន្លេទៅភាគខាងត្បូងនៅពេលព្រឹក ប៉ុន្តែទឹកបានស្រកទៅវិញនៅពេលរសៀល។

ប្រជាពលរដ្ឋដែលរស់នៅក្នុងតំបន់ទំនាបក្បែរទន្លេ Nullah Lai ដែលហូរកាត់ទីក្រុង Rawalpindi ជាប់នឹងរដ្ឋធានី Islamabad ត្រូវបានបញ្ជាឱ្យជម្លៀសចេញពី លំនៅឋាន បន្ទាប់ពីកម្ពស់ទឹកហក់ឡើងយ៉ាងខ្លាំង។

អ្នកនាំពាក្យរបស់ទីភ្នាក់ងារគ្រោះមហន្តរាយបាននិយាយថាក្រុមជួយសង្គ្រោះកំពុងរង់ចាំសម្រាប់ការជម្លៀសបន្ថែមទៀត ។

ក្រុមអាជ្ញាធរក្រុង Rawalpindi បានប្រកាសថ្ងៃឈប់សម្រាកជាសាធារណៈកាលពីថ្ងៃព្រហស្បតិ៍សប្ដាហ៍នេះ ដើម្បីរក្សាប្រជាជនឲ្យស្នាក់នៅក្នុងផ្ទះ ដោយនាយកដ្ឋានឧតុនិយមជាតិបានព្រមានថាភ្លៀងធ្លាក់ខ្លាំងនឹងបន្តរហូតដល់ថ្ងៃសុក្រសប្ដាហ៍នេះទៀត៕