ក្រសួងសុវត្ថិភាពបាននិយាយថា មនុស្សបួននាក់បានស្លាប់ និងជាង១.០០០នាក់ត្រូវបានជម្លៀសចេញពីលំនៅឋានក្នុងប្រទេសកូរ៉េខាងត្បូង បន្ទាប់ពីប្រទេសនេះត្រូវបានវាយប្រហារដោយភ្លៀងធ្លាក់ខ្លាំងបំផុតមិនធ្លាប់មានក្នុងរយៈពេល១២០ឆ្នាំ កាលពីថ្ងៃព្រហស្បតិ៍សប្ដាហ៍នេះ ។  

មន្ត្រីភ្នាក់ងារពន្លត់អគ្គិភ័យបាននិយាយថា អ្នកបើកបររថយន្តម្នាក់បានស្លាប់ បន្ទាប់ពីជញ្ជាំងផ្លូវកម្ពស់ ១០ ម៉ែត្រ បានដួលរលំលើរថយន្តដែលកំពុងបើកបរកាលពីថ្ងៃពុធក្នុងទីក្រុង Osan ចម្ងាយប្រហែល ៤៤គីឡូម៉ែត្រ ភាគខាងត្បូងនៃទីក្រុងសេអ៊ូល។    

មនុស្សបីនាក់ផ្សេងទៀតត្រូវបានគេប្រទះឃើញស្លាប់ដោយឡែកពីគ្នាកាលពីថ្ងៃព្រហស្បតិ៍នៅក្នុងរថយន្តលិចទឹក អូរ និងបន្ទប់ក្រោមដីលិចទឹកនៅតំបន់ភាគខាងត្បូង។ មន្ត្រីក្រសួងបាននិយាយថា ពួកគេកំពុងស៊ើបអង្កេតថាតើការស្លាប់ទាំងនោះបណ្ដាលមកពីភ្លៀងធ្លាក់ខ្លាំងដោយផ្ទាល់ឬអត់។

ក្រសួងបាននិយាយនៅក្នុងសេចក្តីថ្លែងការណ៍មួយថា ភ្លៀងធ្លាក់ខ្លាំងបានបង្ខំឱ្យមានការជម្លៀសមនុស្ស១.៣៨២នាក់ ចេញពីផ្ទះសម្បែងរបស់ពួកគេ ដោយបន្ថែមជើងហោះហើរចំនួន ៤៦ ត្រូវបានលុបចោល។

យោងតាមក្រសួងខាងលើ បានឲ្យដឹងថា ផ្នែកខ្លះនៃខេត្ត ជុងឈឹង (Chungcheong) ភាគខាងត្បូង បានទទួលកម្រិតទឹកភ្លៀងរហូតដល់ ១៦,៥អ៊ីញ ចាប់តាំងពីថ្ងៃពុធសប្ដាហ៍នេះមក៕