បាតុកម្មទ្រង់ទ្រាយធំ និងព្រឹត្តិការណ៍ប្រឆាំងគោលនយោបាយដ៏ចម្រូងចម្រាសរបស់លោកប្រធានាធិបតីអាមេរិក Donald Trump ដែលរួមមានការនិរទេសជនអន្តោប្រវេសន៍ និងការកាត់ជំនួយសុខភាព និងសំណាញ់សុវត្ថិភាពផ្សេងទៀតសម្រាប់ប្រជាជនក្រីក្រនៅសហរដ្ឋអាមេរិក បានចាប់ផ្តើមយ៉ាងតានតឹងកាលពីថ្ងៃព្រហស្បតិ៍ (១៧ កក្កដា) នៅជាង ១.៦០០ទីតាំងនៅទូទាំងប្រទេស។

ទិវាសកម្មភាពជាតិទ្រង់ទ្រាយធំប្រឆាំងលោក Trump នេះ ធ្វើឡើងក្រោមឈ្មោះថា "បញ្ហាល្អបន្តកើតឡើង" (Good Trouble Lives On) ដោយការតវ៉ាត្រូវធ្វើឡើងតាមដងផ្លូវ ទីតាំងតុលាការ និងទីសាធារណៈផ្សេងទៀត ខណៈអ្នករៀបចំអំពាវនាវឱ្យតវ៉ាដោយសន្តិភាព។ បាតុកម្មធំៗធ្វើឡើងនៅក្រុង Atlanta និង St. Louis ក៏ដូចជាក្រុង Oakland របស់រដ្ឋ California និងក្រុង Annapolis របស់រដ្ឋ Maryland ជាមួយនឹងហ្វូងមនុស្សចេញដើរយ៉ាងកុះករតាមដងផ្លូវ។

អ្នកចូលរូមតវ៉ានិយាយថា អាមេរិកកំពុងប្រឈមនឹងពេលវេលាគួរឱ្យភ័យខ្លាចបំផុតមួយក្នុងប្រវត្តិសាស្រ្តជាតិ ជាមួយនឹងកំណើនភាពផ្ដាច់ការ ភាពគ្មានច្បាប់ក្នុងរដ្ឋបាល ក៏ដូចជាសិទ្ធិសេរីភាពនៃប្រជាធិបតតេយ្យកំពុងជួបគ្រោះថ្នាក់។

ការរុញច្រានប្រឆាំងនឹងលោក Trump ក្នុងអាណត្តិទី២ រហូតមកដល់ពេលនេះ បានផ្តោតលើការបង្រ្កាប និរទេស និងយុទ្ធសាស្ត្រអនុវត្តច្បាប់អន្តោប្រវេសន៍មិនបន្ធូរដៃរបស់លោក។ ការឆ្មក់ចាប់ខ្លួនជនដែលរស់នៅអាមេរិកដោយខុសច្បាប់ បានបង្កកំហឹងក្នុងចំណោមប្រជាជន ដោយអ្នកតវ៉ារាប់ពាន់នាក់បានចាប់ផ្តើមធ្វើបាតុកម្មយ៉ាងហិង្សានៅតាមដងផ្លូវក្នុងទីក្រុង Los Angeles កាលថ្ងៃទី០៨ ខែមិថុនា។

បាតុកម្មទ្រង់ទ្រាយធំមួយទៀតថ្ងៃទី១៤ ខែមិថុនា ក្រោមឈ្មោះថា "គ្មានស្ដេច" ក៏បានមើលឃើញមនុស្សជិតលាននាក់ដើរតវ៉ារាប់រយទីតាំងចាប់ពីទីក្រុង New York ទៅដល់ San Francisco ។ ក្រុមបាតុករចាត់ទុកលោក Trump ថាជាជនផ្តាច់ការ ហើយរិះគន់លោកថាធ្វើខ្លួនដូចជាស្ដេច ព្រោះតែការប្រារព្ធខួបកំណើតរបស់លោកជាមួយនឹងការដង្ហែក្បួនយោធាដ៏ធំ៕