យោងតាមរបាយការណ៍របស់សារព័ត៌មាន Politico បានឱ្យដឹងថា ប្រធានាធិបតីអាមេរិក លោក Donald Trump កាលពីថ្ងៃពុធ (១៦ កក្កដា) សប្ដាហ៍នេះបានបង្ហាញពីផែនការថ្មីមួយក្នុងការដាក់អត្រាពន្ធរួម ទៅលើប្រទេស និងតំបន់ជាង១៥០ ទូទាំងសកលលោក។

លោក Trump បានប្រាប់អ្នកយកព័ត៌មានអំឡុងកិច្ចពិភាក្សាជាមួយព្រះអង្គម្ចាស់បារ៉ែនថា "អត្រានឹងដូចគ្នាសម្រាប់ក្រុមសេដ្ឋកិច្ចដែលបានជ្រើសរើសនោះ"។ អត្រាពន្ធនៅក្រោមវិធានការថ្មីនេះត្រូវបានលោក Trump ចាត់ទុកថា "មិនធំពេកទេ" ហើយដាក់លើអ្នកដែលមិនសូវធ្វើអាជីវកម្មច្រើនជាមួយអាមេរិក។

គួររម្លឹកថា នៅក្នុងខែមេសា រដ្ឋបាលលោក Trump បានណែនាំពន្ធមូលដ្ឋាន ១០% លើសេដ្ឋកិច្ចដែលពុំមានកិច្ចព្រមព្រៀងទ្វេភាគី។ ទោះបីជាលោក Trump ធ្លាប់បានបង្ហើបថា កម្រិតមូលដ្ឋានថ្មីអាចដំឡើងដល់ ១៥% ឬ ២០% ក៏ដោយ ក៏លោកមិនបានបញ្ជាក់ពីអត្រាថ្មីជាក់លាក់ទេកាលពីថ្ងៃពុធនោះ។ សារព័ត៌មាន Bloomberg រាយការណ៍ថា អត្រាថ្មីអាចចន្លោះពី ១០% ទៅ ១៥%។

របាយការណ៍និយាយថា រដ្ឋាភិបាលអាមេរិកបានផ្ញើលិខិតទៅកាន់ប្រទេសរាប់សិបរួចមកហើយ រួមទាំងសហភាពអឺរ៉ុប ជប៉ុន និងកូរ៉េខាងត្បូងផងដែរ ដោយបញ្ជាក់ពីអត្រាពន្ធដែលពួកគេនឹងត្រូវប្រឈម ចាប់ពីថ្ងៃទី០១ ខែសីហា។ ទោះយ៉ាងនេះក្ដី អ្នកវិភាគ និងអ្នកសង្កេតការណ៍ បានងឿងឆ្ងល់ថា តើកាលបរិច្ឆេទកំណត់នេះនឹងចូលជាធរមានដូចដែលគ្រោងទុកនៅថ្ងៃទី០១ ខែសីហា ឬទេ ស្របពេលមានក្ដីបារម្ភពីផលប៉ះពាល់អាចកើតមានទៅលើសេដ្ឋកិច្ច និងនយោបាយក្នុងស្រុកផ្ទាល់របស់អាមេរិក៕