ការិយាល័យគណៈសង្ឃអាមេរិកឡាទីននៃទីក្រុងហ្ស៊េរុយសាឡឹមបាននិយាយថា កងកម្លាំងអ៊ីស្រាអែល បានទម្លាក់គ្រាប់បែកលើវិហារកាតូលិកដែលមានតែមួយគត់នៅតំបន់ហ្កាហ្សា ដោយបានសម្លាប់មនុស្ស៣នាក់ និងយ៉ាងហោចណាស់១០នាក់ផ្សេងទៀតបានរងរបួស ខណៈយោធានៅតែបន្តការវាយលុករបស់ខ្លួននៅទូទាំងតំបន់ដែលត្រូវបានហ៊ុមព័ទ្ធមួយនេះ។

ការិយាល័យគណៈសង្ឃ បាននិយាយនៅក្នុងសេចក្តីថ្លែងការណ៍ថា យ៉ាងហោចណាស់មនុស្សម្នាក់ស្ថិតក្នុងស្ថានភាពរបួសធ្ងន់ដែលបណ្តាលមកពីការវាយប្រហារកាលពីថ្ងៃព្រហស្បតិ៍លើវិហារគ្រួសារបរិសុទ្ធនៅទីក្រុងហ្កាហ្សា។ បុព្វជិតរបស់ព្រះវិហារក៏បានរងរបួសផងដែរ។ ក្នុងចំណោមអ្នកស្លាប់ទាំងនោះមានអ្នកបោសសម្អាតអាយុ ៦០ឆ្នាំរបស់វិហារកាតូលិក និងស្ត្រីអាយុ ៨៤ ឆ្នាំម្នាក់ នៅក្នុងបរិវេណព្រះវិហារ។

ប្រភពពីផ្នែកវេជ្ជសាស្ត្របានប្រាប់ប្រព័ន្ធផ្សព្វផ្សាយ Al Jazeera ថាការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សាកាលពីថ្ងៃព្រហស្បតិ៍បានសម្លាប់ពលរដ្ឋប៉ាឡេស្ទីនយ៉ាងហោចណាស់៣២នាក់រួមទាំង ២៥នាក់នៅក្នុងទីក្រុងហ្កាហ្សាតែមួយ។ វីដេអូនៃការវាយប្រហារវិហារ Holy Family Church ត្រូវបានចេញផ្សាយដោយសកម្មជនប៉ាឡេស្ទីន។

 លោក Shadi Abu Dawoud ពលរដ្ឋប៉ាឡេស្ទីនអាយុ៤៧ឆ្នាំ ជាគ្រឹស្តបរិស័ទប៉ាឡេស្ទីន បាននិយាយថាសាលធំរបស់ព្រះវិហារបានផ្តល់ទីជម្រកដល់ពលរដ្ឋភៀសខ្លួនរាប់សិបនាក់ ភាគច្រើនជាកុមារនិងមនុស្សចាស់។