មេបញ្ជាការយោធាក្រុមកុលសម្ព័ន្ធ Bedouin បានប្រាប់សារព័ត៌មានរ៉យទ័រកាលពីថ្ងៃព្រហស្បតិ៍ថា គ្រួសារកុលសម្ព័ន្ធ Bedouinនៅស៊ីរីមកពីខេត្ត Sweida បានភៀសខ្លួនទៅកាន់ទីក្រុង Deraa កាលពីថ្ងៃព្រហស្បតិ៍ដោយគេចចេញពីអ្វីដែលពួកគេបានពិពណ៌នាថាជាការវាយប្រហារដ៏ឃោរឃៅដោយអ្នកប្រយុទ្ធជនជាតិភាគតិចឌ្រុស(Druze)។

ទន្ទឹមនឹងនេះ ក្រុមអ្នកប្រយុទ្ធកុលសម្ព័ន្ធ បេឌូអ៊ីន(Bedouin) ប្រដាប់អាវុធ បានប្រមូលផ្តុំគ្នានៅទីក្រុង Deraa ហើយបានចល័តតាមម៉ូតូនិងរថយន្ត ឆ្ពោះទៅកាន់ ខេត្តSweida ខណៈពួកគេចាប់ផ្តើមការវាយលុកថ្មីនៅក្នុងខេត្ត Sweida របស់ប្រទេសស៊ីរី ប្រឆាំងអ្នកប្រយុទ្ធ ជនជាតិភាគតិចDruze ។

មេដឹកនាំប្រទេសស៊ីរី លោក Ahmed al-Sharaa បានចោទប្រកាន់អ៊ីស្រាអែលថាបានព្យាយាមបំបែកប្រទេសស៊ីរី និងបានសន្យាថានឹងការពារជនជាតិភាគតិច Druze របស់ខ្លួន បន្ទាប់ពីការធ្វើអន្តរាគមន៍របស់សហរដ្ឋអាមេរិកដើម្បីជួយឲ្យទទួលបានបទឈប់បាញ់ក្នុងការប្រយុទ្ធគ្នារវាងកងកម្លាំងរដ្ឋាភិបាល និងអ្នកប្រយុទ្ធជនជាតិភាគតិច Druze ។ កាលពីពេលយប់ កងទ័ពរបស់រដ្ឋាភិបាលដឹកនាំដោយក្រុមឥស្លាមនិយម បានដកខ្លួនចេញពីខេត្ត Sweida ជាទីដែលមនុស្សរាប់សិបនាក់ត្រូវបានសម្លាប់នៅក្នុងជម្លោះជាច្រើនថ្ងៃបណ្តាលមកពីអ្នកប្រយុទ្ធជនជាតិភាគតិច Druze ប្រឆាំងនឹងកងទ័ពរដ្ឋាភិបាល និងក្រុមកុលសម្ព័ន្ធ Bedouin។

អំពើហិង្សានៅក្នុងប្រទេសស៊ីរី បានកើនឡើងយ៉ាងខ្លាំង នៅពេលដែលអ៊ីស្រាអែលចាប់ផ្តើមការវាយប្រហារតាមអាកាសនៅក្នុងទីក្រុងដាម៉ាស ខណៈក៏វាយប្រហារលើកងកម្លាំងរដ្ឋាភិបាលនៅភាគខាងត្បូងដោយទាមទារឱ្យពួកគេដកខ្លួនចេញ និងបាននិយាយថាអ៊ីស្រាអែលមានបំណងការពារជនជាតិភាគតិច Druze ស៊ីរី ។