អង្គការឃ្លាំមើលសិទ្ធិមនុស្សស៊ីរី (SOHR) ដែលមានមូលដ្ឋាននៅចក្រភពអង់គ្លេស បាននិយាយថា មនុស្សចំនួន ៥៩៤នាក់ ត្រូវបានសម្លាប់ក្នុងអំឡុងជម្លោះដ៏ហិង្សានាពេលថ្មីៗនេះនៅភាគខាងត្បូងប្រទេសស៊ីរី ដែលបានឈានដល់ការប្រយុទ្ធវាងបក្សនិកាយ បន្ទាប់ពីការផ្ទុះឡើងយ៉ាងធ្ងន់ធ្ងរនៃអំពើកាប់សម្លាប់យ៉ាងឃោរឃៅនៅក្រុង Sweida ចាប់តាំងពីថ្ងៃអាទិត្យចុងសប្ដាហ៍មុនមក។

ក្រុម SOHR បាននិយាយនៅល្ងាចថ្ងៃព្រហស្បតិ៍ (១៧ កក្កដា) ថា សមាជិក ៣០០នាក់ នៃជនជាតិភាគតិចកាន់សាសនា Druze ត្រូវបានសម្លាប់ រួមទាំងអ្នកប្រយុទ្ធ ១៤៦នាក់ និងជនស៊ីវិល ១៥៤នាក់ ដែលក្នុងនោះ មានមនុស្ស ៨៣នាក់ត្រូវបាន "ប្រហារជីវិត" ដោយកងកម្លាំងរដ្ឋាភិបាលថ្មី។

ក្រុមឃ្លាំមើលនេះបន្តថា យ៉ាងហោចណាស់បុគ្គលិករដ្ឋាភិបាល ២៥៧នាក់ និងយុទ្ធជនបក្ស Bedouin ចំនួន ១៨នាក់ក៏ត្រូវបានសម្លាប់ផងដែរ ខណៈជនស៊ីវិល Bedouin បីនាក់ត្រូវបានសម្លាប់ដោយយុទ្ធជន Druze ។ សូមបញ្ជាក់ថា ការប្រយុទ្ធគ្នាថ្មីៗនេះត្រូវបានបង្កឡើងដោយជម្លោះរវាងសហគមន៍ Bedouin និង Druze នៅភាគខាងត្បូងប្រទេសស៊ីរី។

ភាពស្ងប់ស្ងាត់ដែលមិនសូវស្រួលចិត្តបានត្រឡប់មកវិញកាលពីថ្ងៃព្រហស្បតិ៍ នៅផ្នែកភាគច្រើននៃតំបនភាគខាងត្បូង ជាមួយនឹងការដកកងកម្លាំងរដ្ឋាភិបាលចេញពីទីតាំងភាគច្រើននៃទីក្រុង Sweida ដែលមានប្រជាពលរដ្ឋ Druz រស់នៅច្រើនកុះករ និងបទឈប់បាញ់ដ៏ផុយស្រួយមួយ ហើយអ្នកស្រុកបានរាយការណ៍ថាមានការខូចខាតធ្ងន់ធ្ងរ និងការលួចប្លន់ ក៏ដូចជាសាកសពជាច្រើនត្រូវបានមើលឃើញរាយប៉ាយនៅតាមដងផ្លូវ៕