ខណៈដែលសង្រ្គាមស៊ីវិលនៅប្រទេសស៊ូដង់ បន្តអូសបន្លាយ ភាពអត់ឃ្លានកំពុងក្លាយជាអាវុធមហាប្រល័យសម្រាប់ប្រជាជនរាប់លាននាក់។ កាលពីដើមឆ្នាំ២០២៥ នេះ សហរដ្ឋអាមេរិក បានផ្អាកកម្មវិធីមនុស្សធម៌ភាគច្រើនរបស់ខ្លួននៅស៊ូដង់ ហើយឥឡូវនេះ ផ្ទះបាយសហគមន៍កំពុងដួលរលំ ខណៈក្រុមគ្រួសារបង្ខំចិត្តរើសសំណល់អេតចាយដើម្បីលក់ដូរអាហារចម្អែតក្រពះ នៅក្នុងអ្វីដែលបុគ្គលិកជំនួយហៅថាជាវិបត្តិជំរុញដោយនយោបាយ មិនព្រោះសង្គ្រាមតែម្យ៉ាងទេ។

ស៊ូដង់ កំពុងប្រឈមនឹងវិបត្តិជនភៀសខ្លួនដ៏អាក្រក់បំផុតមួយរបស់ពិភពលោក។ តួលេខអង្គការសហប្រជាជាតិបង្ហាញថា ចាប់តាំងពីសង្គ្រាមចាប់ផ្តើមនៅខែមេសា ឆ្នាំ២០២៣ មក មនុស្សជិត ១៣លាននាក់ បានរត់ចេញពីផ្ទះសម្បែងនៅទូទាំងប្រទេស។ ជនភៀសខ្លួនទាំងនោះបានរត់គេចដោយកាន់បង្វិចសំលៀកបំពាក់តិចតួចប៉ុណ្ណោះ ហើយស្វះស្វែងរកទីជ្រកកោននៅកន្លែងផ្សេងទៀតក្នុងតំបន់។

នៅស៊ូដង់ មនុស្ស ២៤,៦លាននាក់ ពុំមានអាហារគ្រប់គ្រាន់សម្រាប់បរិភោគនោះទេ រួមទាំងយ៉ាងហោចណាស់ ៦៣៨.០០០នាក់ ដែលប្រឈមមុខនឹងហានិភ័យនៃភាពអត់ឃ្លាន នេះបើតាមតួលេខទីភ្នាក់ងារជំនួយ។ ការកាត់បន្ថយជំនួយដែលកំពុងបន្ត ជាពិសេសពីសំណាក់សហរដ្ឋអាមេរិក បានធ្វើឱ្យវិបត្តិនេះកាន់តែស៊ីជម្រៅ ដែលជំរុញឱ្យមនុស្សកាន់តែច្រើនខិតទៅជិតមាត់ជ្រោះ។

ចាប់តាំងពីខែមករាមក ការកាត់បន្ថយមូលនិធិបានបង្ខំឱ្យបិទជិត ៨០% នៃមជ្ឈមណ្ឌលអាហារសង្គ្រោះបន្ទាន់ ដោយបិទផ្ទះបាយសហគមន៍ជាង ១.១០០កន្លែងទូទាំងប្រទេសស៊ូដង់។ នេះបានធ្វើឱ្យមនុស្សជិតពីរលាននាក់កំពុងជួបការលំបាកក្នុងជីវភាពរស់នៅ ដោយពុំមានជំនួយអាហារសំខាន់ៗ៕