ប្រភពដែលដឹងពីកិច្ចការរដ្ឋបាលរបស់លោកប្រធានាធិបតីអាមេរិក Donald Trump បាននិយាយថា សហរដ្ឋអាមេរិក មានគោលបំណងរៀបចំក្រុមនៃសេដ្ឋកិច្ចធំៗទាំង២០ ឬហៅថា G20 ឱ្យត្រលប់ទៅរកឫសគល់ហិរញ្ញវត្ថុរបស់ខ្លួនវិញនៅឆ្នាំក្រោយនេះ នៅពេលដែលទីក្រុងវ៉ាស៊ីនតោន ចូលកាន់តំណែងជាប្រធានប្តូរវេនពីអាហ្វ្រិកខាងត្បូង។

សហរដ្ឋអាមេរិក បានកាត់បន្ថយការចូលរួមរបស់ខ្លួននៅឆ្នាំនេះ ដោយរដ្ឋមន្ត្រីក្រសួងរតនាគារ លោក Scott Bessent បានរំលងកិច្ចប្រជុំរបស់ប្រធានហិរញ្ញវត្ថុ G20 នៅទីក្រុង Durban ប្រទេសអាហ្វ្រិកខាងត្បូង នៅថ្ងៃព្រហស្បតិ៍ និងថ្ងៃសុក្រ ក្នុងសប្ដាហ៍នេះ ដែលនេះជាអវត្តមានលើកទីពីរហើយរបស់លោក Bessent ពីព្រឹត្តិការណ៍ G20 នៅឆ្នាំនេះ។

ក្រុមអ្នកជំនាញ និងប្រភពរដ្ឋបាលនិយាយថា អវត្តមានមន្ត្រីជាន់ខ្ពស់របស់អាមេរិក បានឆ្លុះបញ្ចាំងពីការសង្ស័យរបស់រដ្ឋបាលលោក Trump លើស្ថាប័នពហុភាគីដូចជា G20 បែបនេះ ដែលអាមេរិក បានជួយបង្កើតឡើងក្នុងឆ្នាំ១៩៩៩។ ប្រភពបីរបស់អាមេរិក និយាយថា នៅពេលឡើងជាប្រធាន ទីក្រុងវ៉ាស៊ីនតោន នឹងផ្តោតលើ "ច្រក" ចំនួនពីរ -ពោលគឺកិច្ចប្រជុំកំពូលរបស់មេដឹកនាំ និងច្រកហិរញ្ញវត្ថុ - ដោយលុបបំបាត់ក្រុមការងារមិនចាំបាច់ផ្សេងៗ និងកិច្ចប្រជុំថ្នាក់រដ្ឋមន្ត្រី រួមទាំងផ្នែកថាមពលសុខភាពពាណិជ្ជកម្ម និងបរិស្ថាន។

លោក Trump បានធ្វើឱ្យសេដ្ឋកិច្ចពិភពលោកជួបសង្គ្រាមពាណិជ្ជកម្មដ៏ធំទូលាយមួយរួចមកហើយ ដោយដាក់គោលដៅប្រទេសកំពុងអភិវឌ្ឍជាច្រើន រួមទាំងសមាជិក G20 ផងដែរ ស្របពេលកាត់បន្ថយមូលនិធិអភិវឌ្ឍបរទេសដើម្បីបន្តធ្វើរបៀបវារៈ "យកអាមេរិកជាធំ" របស់លោក៕