ហ្វីលីពីន និងសហរដ្ឋអាមេរិក បានធ្វើសមយុទ្ធដែនសមុទ្ររួមគ្នានៅក្នុងសមុទ្រចិនខាងត្បូងដែលមានជម្លោះ កាលពីថ្ងៃពុធសប្ដាហ៍នេះ ដើម្បីពង្រឹងការសម្របសម្រួលកងទ័ពជើងទឹករវាងសម្ព័ន្ធមិត្តជិតស្និទ្ធទាំងពីរ និងកែលម្អការយល់ដឹងពីដែនសមុទ្រនៅផ្លូវទឹកយុទ្ធសាស្រ្ត ដែលចិន អះអាងសិទ្ធិស្ទើរតែទាំងស្រុង ហើយកើតឡើងត្រឹមតែប៉ុន្មានថ្ងៃប៉ុណ្ណោះមុនប្រធានាធិបតីហ្វីលីពីន លោក Ferdinand Marcos Jr. ទៅបំពេញទស្សនកិច្ចនៅទីក្រុងវ៉ាស៊ីនតោន។

យោធាហ្វីលីពីនបាននិយាយក្នុងសេចក្តីថ្លែងការណ៍មួយកាលពីល្ងាចថ្ងៃពុធថា កងទ័ពជើងទឹកហ្វីលីពីន បានដាក់ពង្រាយនាវាចម្បាំងថ្មីបំផុតរបស់ខ្លួនឈ្មោះ BRP Miguel Malvar ដើម្បីចូលរួមក្នុងសមយុទ្ធកងទ័ពជើងទឹកលើកទី៨ នៅក្នុងតំបន់សេដ្ឋកិច្ចផ្តាច់មុខរបស់ទីក្រុងម៉ានីល រួមជាមួយនឹងនាវាពិឃាតមីស៊ីល USS Curtis Wilbur របស់កងទ័ពជើងទឹកអាមេរិក។

កិច្ចសហប្រតិបត្តិការយោធាពហុជាតិបានក្លាយជារឿងធម្មតាថ្មីមួយនៅក្នុងសមុទ្រចិនខាងត្បូង ខណៈហ្វីលីពីន សហរដ្ឋអាមេរិក និងសម្ព័ន្ធមិត្តសំខាន់ៗផ្សេងទៀតបង្កើនប្រតិបត្តិការរួមគ្នាដើម្បីទប់ទល់នឹងវត្តមានដែលកំពុងកើនឡើងរបស់ចិន។

សមយុទ្ធកងទ័ពជើងទឹករួមនាពេលកន្លងមកបានមើលឃើញកងទ័ពជើងទឹកហ្វីលីពីន និងអាមេរិក ធ្វើសមយុទ្ធទំនាក់ទំនង ដែលសំដៅលើការសម្របសម្រួល និងសមយុទ្ធរាយការណ៍ទំនាក់ទំនង ក្នុងគោលបំណងអនុវត្តការកំណត់អត្តសញ្ញាណ និងការរាយការណ៍អំពីនាវាមិនស្គាល់ប្រភព នៅក្នុងដែនទឹកដ៏ប្រកួតប្រជែងនេះ៕