នាយករដ្ឋមន្ត្រីអង់គ្លេស លោក Keir Starmer និងអធិការបតីអាល្លឺម៉ង់ Friedrich Merz បានចុះហត្ថលេខាលើសន្ធិសញ្ញាដ៏សំខាន់មួយ កាលពីថ្ងៃព្រហស្បតិ៍ ដែលសន្យាថា នឹងរឹតបន្តឹងទំនាក់ទំនងការពារជាតិ ខណៈដែលប្រទេសអឺរ៉ុប ព្យាយាមការពារអ៊ុយក្រែន និងខ្លួនពួកគេ ពីភាពឈ្លានពានរបស់រុស្ស៊ី ដោយប្រឈមនឹងការបង្វែរការគាំទ្រពីរដ្ឋបាលដែលផ្តោតលើសហរដ្ឋអាមេរិករបស់លោកប្រធានាធិបតី ដូណាល់ ត្រាំ (Donald Trump)។

លោក Merz បាននិយាយថា នេះគឺជា «ថ្ងៃប្រវត្តិសាស្ត្រសម្រាប់ទំនាក់ទំនងអាល្លឺម៉ង់-អង់គ្លេស» ខណៈដែលលោកបានចុះហត្ថលេខាលើកិច្ចព្រមព្រៀងដែលប្តេជ្ញាផងដែរដល់ប្រទេសទាំងពីរ ក្នុងការជំរុញការវិនិយោគ និងពង្រឹងកិច្ចសហប្រតិបត្តិការអនុវត្តច្បាប់ប្រឆាំងនឹងក្រុមឧក្រិដ្ឋជនរត់ពន្ធមនុស្ស ដោយធ្វើដំណើរតាមសមុទ្រ English Channel។

លោក Merz បាននិយាយថា៖«យើងចង់ធ្វើការជាមួយគ្នា ឲ្យកាន់តែជិតស្និទ្ធ ជាពិសេសបន្ទាប់ពីចក្រភពអង់គ្លេសដកខ្លួនចេញពីសហភាពអឺរ៉ុប»។ «វាយឺតពេលសម្រាប់ពួកយើង ក្នុងការបញ្ចប់សន្ធិសញ្ញាបែបនេះ ជាមួយគ្នាទៅវិញទៅមក»។

សន្ធិសញ្ញានេះ បង្កើតឡើង ដោយផ្អែកលើកិច្ចព្រមព្រៀងការពារជាតិ ដែលចក្រភពអង់គ្លេស និងអាល្លឺម៉ង់ ជាអ្នកគាំទ្រអឺរ៉ុបដ៏ធំបំផុតរបស់អ៊ុយក្រែន បានចុះហត្ថលេខាកាលពីឆ្នាំមុន ដោយប្តេជ្ញាចិត្ត ដើម្បីធ្វើកិច្ចសហប្រតិបត្តិការឲ្យកាន់តែជិតស្និទ្ធប្រឆាំងនឹងការគំរាមកំហែងកាន់តែខ្លាំងឡើងពីប្រទេសរុស្ស៊ី។

សន្ធិសញ្ញានេះដែរ រួមបញ្ចូលទាំងការសន្យាថា នឹង«ជួយគ្នាទៅវិញទៅមក រួមទាំងដោយមធ្យោបាយយោធា ក្នុងករណីមានការវាយប្រហារដោយប្រដាប់អាវុធ ទៅលើភាគីម្ខាងទៀត» ទោះបីជាវាមិនច្បាស់ថានឹងមានផលប៉ះពាល់ជាក់ស្តែងអ្វីនោះទេ ចាប់តាំងពីប្រទេសទាំងពីរ គឺជាសមាជិករបស់អង្គការណាតូ និងត្រូវបានភ្ជាប់កាតព្វកិច្ច ដោយកិច្ចព្រមព្រៀងការពារទៅវិញទៅមករបស់សម្ព័ន្ធភាពយោធានេះ។