ប្រធានាធិបតីប្រេស៊ីល លោក Luiz Lula da Silva បាននិយាយនៅក្នុងសុន្ទរកថា ទៅកាន់ប្រជាជាតិថា ការអំពាវនាវរបស់ប្រធានាធិបតីអាមេរិក លោក ដូណាល់ ត្រាំ ( Donald Trump) ឲ្យបញ្ចប់ការស៊ើបអង្កេតផ្លូវច្បាប់លើសំណុំរឿងរបស់អតីតមេដឹកនាំប្រេស៊ីលលោក Jair Bolsonaro (២០១៩-២០២២) គឺជាការវាយប្រហារលើអធិបតេយ្យភាពរបស់ប្រទេសនេះ។

លោកបាននិយាយថា៖«ការប៉ុនប៉ងណាមួយ ដើម្បីមានឥទ្ធិពលលើប្រព័ន្ធច្បាប់របស់ប្រទេសប្រេស៊ីល គឺជាការវាយប្រហារយ៉ាងធ្ងន់ធ្ងរលើអធិបតេយ្យភាពជាតិ»។

យោងតាមមេដឹកនាំប្រេស៊ីលរូបនេះ លោកមានការខឹងសម្បារយ៉ាងខ្លាំងចំពោះការពិតដែលថា «ការវាយប្រហារលើប្រទេសនេះ ត្រូវបានគាំទ្រដោយអ្នកនយោបាយប្រេស៊ីលជាច្រើន»។ លោកបានសង្កត់ធ្ងន់ថា៖ «ពួកគេ គឺជាជនក្បត់ជាតិពិតប្រាកដនៃមាតុភូមិរបស់ពួកគេ។

នាពេលមុននេះ លោក ត្រាំ បានរិះគន់អាជ្ញាធរប្រេស៊ីលចំពោះសកម្មភាពរបស់ពួកគេ ទាក់ទងនឹង លោក Bolsonaro ដែលកំពុងប្រឈមនឹងការកាត់ទោស នៅក្នុងប្រទេសប្រេស៊ីល ពីបទប៉ុនប៉ងផ្តួលរំលំលោក Lula បន្ទាប់ពីការឈ្នះឆ្នោតជាប្រធានាធិបតី នៅឆ្នាំ ២០២២។ ក្រោយមក លោកប្រធានាធិបតីអាមេរិកបានជំរុញឲ្យបញ្ចប់ការធ្វើទុក្ខបុកម្នេញតាមផ្លូវច្បាប់ទៅលើអតីតមេដឹកនាំប្រេស៊ីលរូបនេះ។

លោក Lula ក៏បានសង្កត់ធ្ងន់លើការត្រៀមខ្លួនសម្រាប់វិធានការទប់ទល់ណាមួយ ដើម្បីការពារសេដ្ឋកិច្ចរបស់ប្រេស៊ីល បន្ទាប់ពីសហរដ្ឋអាមេរិក បានប្រកាសដាក់ពន្ធ ៥០% លើទំនិញប្រេស៊ីល ចាប់ពីថ្ងៃទី ០១ ខែសីហា។

លោក Lula បាននិយាយនៅក្នុងការបង្ហោះលើបណ្តាញសង្គម X ថា៖«ប្រេស៊ីល គឺជាប្រទេសអធិបតេយ្យមួយ ជាមួយនឹងស្ថាប័នឯករាជ្យជាច្រើន ហើយនឹងមិនទទួលយកទម្រង់ណាមួយនៃការណែនាំឡើយ»។