អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova បាននិយាយថា ប្រទេសរុស្ស៊ី នៅតែបន្តគាំទ្រអធិបតេយ្យភាព និងបូរណភាពទឹកដីរបស់ប្រទេសលីបង់ ស្របពេលសហរដ្ឋអាមេរិក ដាក់សម្ពាធលើសាធារណរដ្ឋនេះ។

នាពេលមុននេះ បេសកជនពិសេសរបស់អាមេរិកប្រចាំតំបន់មជ្ឈិមបូព៌ា លោក Thomas Barrack បានទៅបំពេញទស្សនកិច្ចនៅប្រទេសលីបង់ ដើម្បីពិភាក្សាជាមួយរដ្ឋាភិបាលរបស់ប្រទេសនេះ នូវផែនទីបង្ហាញផ្លូវសម្រាប់ដំណោះស្រាយការទូតចំពោះវិបត្តិលីបង់-អ៊ីស្រាអែល ដែលជាគន្លឹះក្នុងការរំសាយអាវុធរបស់ចលនាហេសបូឡា Shia ។

កាសែតជាតិ បានសរសេរដោយដកស្រង់ប្រភពថា សហរដ្ឋអាមេរិក បាននិងកំពុងដាក់សម្ពាធលើទីក្រុងបេរូត ( Beirut)ន ដោយទាមទារឲ្យចាប់ផ្តើមការរំសាយអាវុធឲ្យបានឆាប់ តាមដែលអាចធ្វើទៅបាន។

អ្នកស្រី Zakharova បាននិយាយថា៖«ជំហររបស់យើងលើប្រធានបទនេះ នៅតែមិនផ្លាស់ប្តូរ។ យើងគាំទ្រអធិបតេយ្យភាព និងបូរណភាពទឹកដីរបស់ប្រទេសលីបង់»។

នៅពេលត្រូវបានស្នើឲ្យធ្វើអត្ថាធិប្បាយអំពីសំណើរបស់សហរដ្ឋអាមេរិក អ្នកស្រីបានបន្ថែមថា៖«ដរាបណា ផែនការរបស់ជនជាតិអាមេរិក នៅតែជាបញ្ហាគួរឲ្យព្រួយបារម្ភ ខ្ញុំគិតថា អ្នកគួរតែសួរពួកគេ»។