​អង់គ្លេស៖ រដ្ឋមន្ត្រី​ក្រសួងសុខាភិបាល​ចក្រភព​អង់គ្លេស​លោក Sajid Javid បាន​ព្រមាន​ថា ការចូល​ព្យាបាល​នៅ​មន្ទីរពេទ្យ​កំពុង​កើនឡើង ហើយ​សេវា​សុខាភិបាល​ជាតិនឹង​ប្រឈមការចុះ​ខ្សោយ​នៅ​រយៈពេល​ពីរ​បី​សប្តាហ៍​ខាងមុខ​។ លោក Javid បាន​និយាយ​ក្នុងអំឡុងពេលដំណើរ​ទស្សនកិច្ច​ទៅកាន់​មន្ទីរពេទ្យ King's College នៅ​ភាគខាងត្បូង​ទីក្រុង​ឡុង​ដ៍ ដែល​លោក​បានលើកឡើង​ពី​សារៈសំខាន់​នៃ​ការចាក់​វ៉ាក់សាំង​បង្ការ​។

លោក Javid បាន​និយាយថា​ លោក​ត្រូវបាន​គេ​ប្រាប់​ក្នុងអំឡុងពេល​ដំណើរ​ទស្សនកិច្ច​របស់​លោក​ថា ៧០%​ នៃ​អ្នកជំងឺ ​COVID-19 នៅក្នុង​បន្ទប់សង្គ្រោះបន្ទាន់​នៃ​មន្ទីរពេទ្យមិនបាន​ចាក់​វ៉ា​ក់សាំង​នោះទេ​។ រដ្ឋមន្ត្រី​សុខាភិបាល​បាន​និយាយថា ការិយាល័យ​ស្ថិតិ​ជាតិរបស់ ចក្រភព​អង់គ្លេស​បាន​ប៉ាន់ប្រមាណ​ថា ​កាលពី​សប្តាហ៍​មុនមនុស្ស​ម្នាក់​ក្នុងចំណោមមនុស្ស ១៥នាក់​នៅ​ទីក្រុងឡុង​ដ៍បាន​ឆ្លង​វីរុស COVID-19។ លោក​និយាយថា​ យើង​មិន​ធ្លាប់​ឃើញ​អត្រា​ឆ្លង​វីរុស COVID-19 បែបនេះពីមុនមក​នោះទេ​។ ទោះជា​យ៉ាងណា លោក​បាន​និយាយថា​ មានសញ្ញា​លើកទឹកចិត្ត​នៅពេល​ប្រៀបធៀប​វីរុស​ប​ម្លែ​ង​ខ្លួន​ថ្មី omicron ទៅនឹង​វីរុស​ប​ម្លែ​ង​ខ្លួន​ថ្មី​មុន​នៃ​វីរុស ​COVID-19 ប៉ុន្តែ​មាន​អត្រា​ឆ្លង​ខ្ពស់​ទោះបីជាមាន​រោគសញ្ញា​ស្រាល​ក៏ដោយ ដែល​យើង​កំពុង​មើលឃើញ​ការចូល​សម្រាក​ព្យាបាលនៅ​មន្ទីរពេទ្យ ហើយបាន​ព្រមាន​ឲ្យ​ប្រជាជន​ឲ្យ​ប្រុងប្រយ័ត្ន​។

នៅ​ចក្រភព​អង់គ្លេសបាន​រាយការណ៍​អំពី​ករណី​ថ្មី​ជិត ១៨០,០០០​ករណីកាលពី​ថ្ងៃ​ព្រហស្បតិ៍​តែមួយ​ថ្ងៃ ការ​កើនឡើង​នៃ​វីរុស​ប​ម្លែ​ង​ខ្លួន​ថ្មី omicron បាន​បង្ខំ​ឱ្យ​បុគ្គលិក​ជាច្រើន​ស្នាក់​នៅផ្ទះ​។ នៅ​ទីក្រុង​ឡុង​ដ៍ បុគ្គលិក​យោធា​ប្រមាណ ២០០នាក់រួមទាំង​គ្រូពេទ្យ​យោធា​ចំនួន ៤០​នាក់​កំពុង​ត្រូវបាន​ដាក់ពង្រាយ​ទៅកាន់​មន្ទីរពេទ្យ ​ដែល​កំពុង​តស៊ូ​ក្នុង​ការផ្តល់​ការថែទាំ​ដ៏​សំខាន់​ក្នុងពេល​ខ្វះ​បុគ្គលិក ដែល​ត្រូវបាន​ដាក់កំហុស​លើ​ចំនួន​បុគ្គលិក​ដែល​ឈឺ ឬ​ធ្វើ​ច​ត្តាឡី​ស័ក​ដោយសារតែ​វីរុស COVID-19៕

អត្ថបទ៖ ប៊ុនថន