សហរដ្ឋអាមេរិក កាលថ្ងៃព្រហស្បតិ៍ (ទី១៧ ខែកក្កដា) បានលើកឡើងថា នឹងមិនមានការផ្លាស់ប្តូរអ្វីឡើយ ជុំវិញគោលនយោបាយរបស់ខ្លួន ចំពោះកោះតៃវ៉ាន់ ប្រសិនបើការឈប់សំចតរបស់មេដឹកនាំកោះស្វ័យគ្រប់គ្រងមួយនេះ ឆ្លងកាត់ដែនដីអាមេរិក ខណៈដែលប្រទេសចិនបានចេញការព្រមាន។

ប៉ារ៉ាហ្គាយ ដែលជាប្រទេសមួយ ក្នុងចំណោមប្រទេសនៅសល់តិចទៅៗ ដែលទទួលស្គាល់ទីក្រុងតៃប៉ិជាជាងទីក្រុងប៉េកាំង បានប្រកាសកាលពីថ្ងៃទី១៤ ខែកក្កដាថា មេដឹកនាំកោះតៃវ៉ាន់ លោក Lai Ching-te នឹងធ្វើទស្សនកិច្ចនៅខែសីហា ដែលទំនងជាមានន័យថា រូបលោកនឹងត្រូវធ្វើដំណើរតាមយន្តហោះឆ្លងកាត់ដែនដីសហរដ្ឋអាមេរិក។

អ្នកនាំពាក្យក្រសួងការបរទេស លោកស្រី Tammy Bruce មិនបានបញ្ជាក់ថា លោក Lai នឹងឈប់សំចតឆ្លងកាត់នោះទេ ប៉ុន្តែបាននិយាយសម្រាលពីផលវិបាកផ្នែកនយោបាយណាមួយ។ លោកស្រីបានប្រាប់អ្នកសារព័ត៌មានថា៖ «ការឈប់សំចតឆ្លងកាត់សហរដ្ឋអាមេរិក ដោយមន្ត្រីកម្រិតខ្ពស់តៃវ៉ាន់ ក្នុងនោះរួមទាំងមេដឹកនាំផងដែរ គឺស្របតាមការអនុវត្តកន្លងមក និងស្របទាំងស្រុងជាមួយនឹងគោលនយោបាយដ៏យូរអង្វែងរបស់យើង»។

លោកស្រី Bruce បានបញ្ជាក់ថា៖ «ការឈប់សំចតឆ្លងកាត់បែបនេះ ត្រូវបានធ្វើឡើង ក្រោមការគិតគូរពីសុវត្ថិភាព ផាសុកភាព ភាពងាយស្រួល និងសេចក្តីថ្លៃថ្នូររបស់អ្នកដំណើរ»។

ក្រសួងការបរទេសចិនបានព្រមានទាំងប៉ារ៉ាហ្គាយ និងសហរដ្ឋអាមេរិកអំពីការធ្វើដំណើររបស់លោក Lai។ តាមរយៈសេចក្តីថ្លែងការណ៍មួយនៅលើបណ្ដាញសង្គម X ក្រសួងការបរទេស បានសង្កត់ធ្ងន់ថា៖ «យើងប្រឆាំងរាល់ដំណើរទស្សនកិច្ចទៅសហរដ្ឋអាមេរិករបស់មេដឹកនាំនៃអាជ្ញាធរកោះតៃវ៉ាន់ មិនថា ក្រោមហេតុផល ឬលេសអ្វីក៏ដោយ»។

ប្រទេសចិនអះអាងថា កោះតៃវ៉ាន់ ដែលគ្រប់គ្រងខ្លួនឯងដោយលទ្ធិប្រជាធិបតេយ្យ ជាដែនដីរបស់ខ្លួន ហើយបានគំរាមក្រសោបកោះនេះដោយកម្លាំង។ សហរដ្ឋអាមេរិកទទួលស្គាល់តែទីក្រុងប៉េកាំងប៉ុណ្ណោះ តែលក់អាវុធឲ្យកោះតៃវ៉ាន់ជាធម្មតា៕