ប្រទេសចិនបានស្វាគមន៍សំណើរបស់រុស្ស៊ី ក្នុងការស្ដារឡើងវិញនូវប្លុកដែលមានសមាជិក ៣ភាគី ជាមួយឥណ្ឌា ដោយលើកឡើងថា កិច្ចសហប្រតិបត្តិការនេះនឹងក្លាយជាផលប្រយោជន៍របស់ប្រទេសទាំង៣ ហើយនឹងរួមចំណែកដល់សន្តិភាព និងសន្តិសុខ ដោយធ្វើឲ្យការរំពឹងទុកមានកាន់តែខ្ពស់ ក្នុងការនាំឲ្យមានរូបរាងនូវសម្ព័ន្ធភាពមួយដែលអាចទប់ទល់នឹងឥទ្ធិពលរបស់សហរដ្ឋអាមេរិក។

គួររំលឹកថា ប្រទេសធំជាងគេបំផុតទាំង៣ នៅលើដែនដីរួមបញ្ចូលគ្នាអាស៊ីអឺរ៉ុប បានរំលេចជាលើកដំបូងនូវគំនិតប្លុកកិច្ចសហប្រតិបត្តិការត្រីភាគី ក្នុងទសវត្សរ៍ឆ្នាំ១៩៩០ ហើយក្រោយមកភាគីទាំង៣ បានបើកកិច្ចប្រជុំថ្នាក់រដ្ឋមន្ត្រីជាច្រើនដង។ ប៉ុន្តែគំនិតផ្តួចផ្តើមនេះបានជាប់គាំងក្នុងប៉ុន្មានឆ្នាំថ្មីៗនេះ ដោយសារតែភាពតានតឹង រវាងចិន និងឥណ្ឌា ជុំវិញបញ្ហាព្រំដែនរបស់ប្រទេសទាំង២។

ការរស់ឡើងវិញនៃប្លុករុស្ស៊ី ឥណ្ឌា ចិន ឬ RIC អាចបង្កបញ្ហាប្រឈមដល់សហរដ្ឋអាមេរិក ប្រសិនបើវានាំឲ្យមានកិច្ចសហប្រតិបត្តិការកាន់តែស្និទ្ធបន្ថែមទៀត ដោយប្រទេសប្រដាប់អាវុធនុយក្លេអ៊ែរទាំង៣ លើបញ្ហាការទូត សេដ្ឋកិច្ច និងសន្តិសុខ។

សំណើ ដើម្បីឲ្យមានកិច្ចសហប្រតិបត្តិការដ៏ធំ ៣ភាគីនេះ កើតឡើងនៅពេលដែលរដ្ឋបាលរបស់ប្រធានាធិបតី លោក Donald Trump កំពុងផ្សព្វផ្សាយរបៀបវារៈ «America First» (អាមេរិកទី១) ក្នុងនោះរួមទាំងការដំឡើងពន្ធខ្ពស់ខ្លាំង ដែលបានធ្វើឲ្យប្រទេសមួយចំនួនមានជំហរមិនច្បាស់លាស់ជាមួយសហរដ្ឋអាមេរិក។

អំឡុងពេលឆ្លើយតបទៅនឹងសំណួរ អំពីការពិភាក្សារបស់រុស្ស៊ី ដើម្បីស្ដារប្លុក RIC អ្នកនាំពាក្យក្រសួងការបរទេសចិន បានប្រាប់ថា កិច្ចសហប្រតិបត្តិការបន្ថែមទៀត រវាងប្រទេសជិតខាង នឹងមានប្រយោជន៍សម្រាប់ប្រទេសទាំងអស់៕