ដោយដកសម្ដីពីស្រង់ប្រភពមិនបញ្ចេញឈ្មោះ កាលពីថ្ងៃព្រហស្បតិ៍ (ទី១៧ ខែកក្កដា) សារព័ត៌មាន Wall Street Journal (WSJ) បានរាយការណ៍ថា ប្រទេសចិនកំពុងគំរាមរាំងខ្ទប់ការលក់កំពង់ផែជាង ៤០ គ្រប់គ្រងដោយក្រុមហ៊ុន CK Hutchison ដែលមានមូលដ្ឋាននៅទីក្រុងហុងកុង ទៅក្រុមហ៊ុន BlackRock និង Mediterranean Shipping Company (MSC) ប្រសិនបើក្រុមហ៊ុនដឹកជញ្ជូនរបស់ចិន Cosco មិនទទួលបានភាគហ៊ុនទេនោះ។

ក្រុមហ៊ុន BlackRock បានបដិសេធមិនធ្វើអត្ថាធិប្បាយអ្វីឡើយ ជុំវិញសេចក្ដីរាយការណ៍នេះ នៅពេលដែលសារព័ត៌មាន Reuters បានទាក់ទងទៅ ហើយក្រុមហ៊ុន CK Hutchison, MSC និង Cosco ក៏មិនបានឆ្លើយតបភ្លាមៗនោះដែរ ចំពោះសំណើរបស់សារព័ត៌មាន Reuters ខណៈដែលរដ្ឋាភិបាលចិន មិនអាចទាក់ទងបានឡើយ នៅក្រៅម៉ោងធ្វើការ។

សារព័ត៌មាននេះ បានឲ្យដឹងថា មន្ត្រីចិន បានប្រាប់ក្រុមហ៊ុន BlackRock, MSC និង CK Hutchison ថាប្រសិនបើក្រុមហ៊ុន Cosco មិនមាននៅក្នុងកិច្ចព្រមព្រៀងទេនោះ ទីក្រុងប៉េកាំងនឹងចាត់វិធានការ ដើម្បីរាំងខ្ទប់សំណើលក់កំពង់ផែនានារបស់ក្រុមហ៊ុន CK Hutchison។

គួរបញ្ជាក់ថា ក្រុមហ៊ុន CK Hutchison របស់មហាសេដ្ឋីលោក Li Ka-shing កាលពីខែមីនា បានប្រកាសថា ខ្លួននឹងលក់ភាគហ៊ុន ៨០ភាគរយរបស់ខ្លួន នៅក្នុងអាជីវកម្មកំពង់ផែ ដែលរួមបញ្ចូលកំពង់ផែចំនួន ៤៣ នៅក្នុងប្រទេសចំនួន ២៣។ អាជីវកម្មនេះមានតម្លៃ ២២,៨ពាន់លានដុល្លារ ក្នុងនោះរួមទាំងបំណុលផងដែរ៕