​រុស្ស៊ី៖ ប្រទេស​រុស្ស៊ី និង​ប្រទេស​ដទៃទៀតនៃ​សម្ព័ន្ធភាព​អង្គការ​សន្ធិសញ្ញា​សន្តិសុខ​រួម (CSTO) បាន​បញ្ជូន​កងទ័ព​ទៅកាន់​ប្រទេស​កា​ហ្សា​ក់​ស្ថាន​កាលពី​ថ្ងៃ​សុក្រ បន្ទាប់ពី​ការតវ៉ារាលដាល​ខ្លាំង​នៅក្នុង​ប្រទេស​អាស៊ី​កណ្តាល​មួយ​នេះ​។ ក្រសួងការពារជាតិ​រុស្ស៊ីបាន​បញ្ចេញវីដេអូដែល​បង្ហាញ​ពីអ្វី​ដែល​ខ្លួន​បាន​និយាយថា ទាហាន​រុស្ស៊ី​មកដល់​អាកាសយានដ្ឋានទីក្រុង Almaty ក្នុងប្រទេស​កា​ហ្សា​ក់​ស្ថាន​។

​ប្រទេស​កា​ហ្សា​ក់​ស្ថាន​កំពុង​ជួបប្រទះ​ការតវ៉ា​ដ៏​អាក្រក់​បំផុត​ ចាប់តាំងពី​ប្រទេស​នេះ​ទទួលបាន​ឯករាជ្យ​ពី​សហភាពសូវៀត​កាលពី​បី​ទសវត្សរ៍​មុន​។​ ​បាតុកម្ម​បានចាប់ផ្តើម​ឡើង​ជុំវិញ​ការកើនឡើង​តម្លៃ​ប្រេងឥន្ធនៈ​ថ្លៃ​ជិត​ទ្វេ​រដង ហើយ​បា​តុកម្មបាន​រាលដាល​ឆាប់រហ័ស​នៅ​ទូទាំងប្រទេស ដោយ​បង្ហាញ​ពី​ការមិនសប្បាយចិត្តកាន់តែ​ខ្លាំង​ឡើង​ ចំពោះ​ការគ្រប់គ្រង​របស់​គណ​បក្ស​តែមួយ​ចាប់តាំងពី​ទទួលបាន​ឯករាជ្យ​។ ការតវ៉ា​បាន​ប្រែក្លាយជា​ហិង្សាដោយ​អគារ​រដ្ឋាភិបាល​ត្រូវបាន​ដុតបំផ្លាញ ហើយ​បាតុករ និង​មន្ត្រី​អនុវត្ត​ច្បាប់​ជាច្រើន​នាក់​បាន​ស្លាប់ និង​រងរបួស​។

​ប្រធានាធិបតី​កា​ហ្សា​ក់​ស្ថានលោក Kassym-Jomart Tokayev ប្តេជ្ញា​ឆ្លើយតបកាន់តែ​តឹងរ៉ឹង ដោយ​លោក​បាន​អំពាវនាវ​ដល់​សម្ព័ន្ធភាព​អង្គការ​សន្ធិសញ្ញាសន្តិសុខ​រួម (CSTO) ឱ្យជួយ​។ មន្ត្រី​​កា​ហ្សា​ក់​ស្ថាន​បាន​ទទូចថា​ កងទ័ព​មកពី​សម្ព័ន្ធមិត្តដែល​រួមមាន​អតីតសាធារ​ណរដ្ឋ​សូ​វៀត​មួយចំនួន នឹងមិន​ប្រយុទ្ធ​ជាមួយ​បាតុករ​នោះទេ ហើយ​ជំនួស​ដោយ​ការការពារ​ស្ថាប័ន​រដ្ឋាភិបាល​៕

អត្ថបទ៖ ប៊ុនថន