ប្រធានការិយាល័យសិទ្ធិមនុស្សរបស់អង្គការសហប្រជាជាតិ (UN) នៅថ្ងៃសុក្រ (ទី១៨ ខែកក្កដា) បានអំពាវនាវឲ្យអាជ្ញាធរបណ្តោះអាសន្នរបស់ប្រទេសស៊ីរី ធានាឲ្យមានការទទួលខុសត្រូវ និងយុត្តិធម៌ ចំពោះការសម្លាប់ និងការរំលោភសិទ្ធិ នៅទីក្រុងភាគខាងត្បូង Sweida។

គួរបញ្ជាក់ថា នៅសប្តាហ៍នេះ រដ្ឋាភិបាលស៊ីរីបានបញ្ជូនទាហានទៅទីក្រុងដែលភាគច្រើនសម្បូរដោយជនជាតិភាគតិចកាន់សាសនា Druze រស់នៅ ដើម្បីបង្ក្រាបការប្រយុទ្ធគ្នា រវាងក្រុមសហគមន៍ Bedouin និង Druze ប៉ុន្តែអំពើហិង្សាបានកើនឡើងកាន់តែខ្លាំងទៅៗ រហូតដល់មានការប្រកាសបទឈប់បាញ់។

ការិយាល័យឧត្តមស្នងការទទួលបន្ទុកសិទ្ធិមនុស្ស (OHCHR) បានលើកឡើងថា ខ្លួនបានទទួលរបាយការណ៍ដ៏គួរឲ្យជឿជាក់បានពីការរីករាលដាលនៃការរំលោភសិទ្ធិ ក្នុងអំឡុងពេលមានការប្រយុទ្ធនេះ។

ទាំងនេះរួមបញ្ចូលទាំងរបាយការណ៍សង្ខេបនៃការប្រហារជីវិត ការចាប់ពង្រត់ និងការបំផ្លិចបំផ្លាញទ្រព្យសម្បត្តិឯកជន ដោយកងកម្លាំងសន្តិសុខ និងបុគ្គលដែលមានទំនាក់ទំនងជាមួយអាជ្ញាធរបណ្តោះអាសន្នរបស់ប្រទេសស៊ីរី ក៏ដូចជាក្រុមប្រដាប់អាវុធផ្សេងទៀត រួមមាន Druze និង Bedouin ជាដើម។

ស្នងការជាន់ខ្ពស់ OHCHR លោក Volker Turk បានឲ្យដឹងនៅក្នុងសេចក្តីថ្លែងការណ៍មួយថា៖ «ការបង្ហូរឈាម និងអំពើហិង្សានេះ ត្រូវតែបញ្ឈប់ ហើយការការពារប្រជាជនទាំងអស់ ត្រូវតែជាអាទិភាពធំបំផុត ស្របតាមច្បាប់សិទ្ធិមនុស្សអន្តរជាតិ»៕