វិមានក្រឹមឡាំង នៅថ្ងៃសុក្រ (ទី១៨ ខែកក្កដា) នេះ បានប្រាប់ឲ្យដឹងថា ប្រទេសរុស្ស៊ីបានបង្កើតអភ័យឯកសិទ្ធិជាក់លាក់មួយ ដើម្បីទប់ទល់ទណ្ឌកម្មរបស់លោកខាងលិច និងសម្របខ្លួនជាមួយចំណាត់ការទាំងនោះ បន្ទាប់ពីសហភាពអឺរ៉ុប (EU) បានយល់ព្រមលើកញ្ចប់ទណ្ឌកម្មទី១៨ ប្រឆាំងនឹងទីក្រុងមូស្គូ ក្នុងនោះរួមទាំងវិធានការសំដៅលើឧស្សាហកម្មប្រេងរបស់ខ្លួនផងដែរ។

ក្រុមអ្នកការទូត បានប្រាប់សារព័ត៌មាន Reuters ថា កញ្ចប់ទណ្ឌកម្មនេះ មានគោលបំណងកំណត់តម្លៃរបស់ក្រុមប្រទេសមានឧស្សាហកម្មលូតលាស់ទាំង៧ ឬ G7 សម្រាប់ការទិញប្រេងឆៅរបស់រុស្ស៊ី ឲ្យមកនៅត្រឹម ៤៧,៦ដុល្លារ ក្នុងមួយបារ៉ែល។

នៅពេលត្រូវបានសួរ អំពីវិធានការថ្មីរបស់ EU អ្នកនាំពាក្យវិមានក្រឹមឡាំង លោក Dmitry Peskov បានពណ៌នាថា ជាការធ្វើតែភាគីម្ខាង និងខុសច្បាប់ ដោយនិយាយថា វិធានការស្របតាមអ្វីដែលលោកចាត់ទុកថា «ជំហរប្រឆាំងរុស្ស៊ីជាប់លាប់» របស់អឺរ៉ុប។

លោក Peskov បានប្រាប់អ្នកសារព័ត៌មានថា៖ «ប៉ុន្តែក្នុងពេលជាមួយគ្នានេះ ពិតណាស់ យើងបានបង្កើតនូវអភ័យឯកសិទ្ធិជាក់លាក់មួយរួចហើយ ដើម្បីទប់ទល់នឹងទណ្ឌកម្មនេះ ពោលគឺយើងបានសម្របខ្លួនទៅនឹងជីវិតក្រោមការដាក់ទណ្ឌកម្ម»។

លោកបានបញ្ជាក់ថា៖ «ពិតណាស់ យើងនឹងត្រូវវិភាគកញ្ចប់ទណ្ឌកម្មថ្មីនេះ ដើម្បីកាត់បន្ថយផលប៉ះពាល់របស់វា។ ប៉ុន្តែលើសពីនេះទៀត កញ្ចប់ទណ្ឌកម្មថ្មីនីមួយៗ នាំមកនូវផលអវិជ្ជមាន សម្រាប់ប្រទេសដែលគាំទ្រវា។ នេះគឺជាអាវុធមុខ ២»៕