តុលាការកំពូលរបស់ប្រទេសប្រេស៊ីលកាលពីថ្ងៃសុក្រ បានចេញដីកាឆែកឆេរ និងដាក់ការរឹតត្បិតលើអតីតប្រធានាធិបតី លោក Jair Bolsonaro ដោយចោទប្រកាន់លោកពីបទស្វែងរកជំនួយពីប្រធានាធិបតីសហរដ្ឋអាមេរិក លោក Donald Trump ដើម្បីជ្រៀតជ្រែកក្នុងប្រព័ន្ធតុលាការរបស់ប្រទេស។

យោងតាមសេចក្តីបង្គាប់ដែលបានចុះហត្ថលេខាដោយចៅក្រម លោក Alexandre de Moraes បានឲ្យដឹងថា នគរបាលសហព័ន្ធបានឆ្មក់ចូលលំនៅឋានរបស់លោក Bolsonaro និងឲ្យលោកពាក់ឧបករណ៍តាមដាន។ តុលាការក៏បានហាមឃាត់លោកពីការទាក់ទងជាមួយមន្ត្រីបរទេស ដោយប្រើប្រាស់ប្រព័ន្ធផ្សព្វផ្សាយសង្គម ឬការទៅរកស្ថានទូត ដោយលើកឡើងពី «លទ្ធភាពជាក់ស្តែង» ដែលលោកអាចភៀសខ្លួនចេញពីប្រទេស។

សេចក្តីសម្រេចនេះធ្វើឡើងបន្ទាប់ពីមានរបាយការណ៍ដែលថា លោក Bolsonaro បានស្វែងរកការគាំទ្រពីបរទេស រួមទាំងពីលោកប្រធានាធិបតី Trump ក្នុងពេលមានការជម្រះក្តីដែលកំពុងបន្តរបស់លោកលើការចោទប្រកាន់ថាលោកបានរៀបចំផែនការធ្វើរដ្ឋប្រហារដើម្បីរារាំងប្រធានាធិបតី លោកLuiz Inacio Lula da Silva ពីការចូលកាន់តំណែងនៅក្នុងឆ្នាំ២០២៣។ លោក Bolsonaro ដែលត្រូវបានហាមឃាត់មិនឱ្យចាកចេញពីប្រទេសប្រេស៊ីល បាននិយាយថាលោកនឹងជួបជាមួយ លោក Trump ប្រសិនបើអាជ្ញាធរប្រគល់លិខិតឆ្លងដែនរបស់លោកមកវិញដែលត្រូវបានរឹបអូសដោយនគរបាលកាលពីឆ្នាំមុន។ លោកបាននិយាយថា លោកបានស្វែងរកអ្នកការទូតជាន់ខ្ពស់របស់សហរដ្ឋអាមេរិកនៅក្នុងប្រទេសប្រេស៊ីល ដើម្បីពិភាក្សាអំពីការគំរាមដំឡើងពន្ធរបស់លោក Trump កាលពីពេលថ្មីៗនេះ ។

កាលពីសប្តាហ៍មុនលោក Trump បានប្រកាសដំឡើងពន្ធ៥០ភាគរយលើទំនិញរបស់ប្រេស៊ីលចាប់ពីថ្ងៃទី១ ខែសីហា ដោយនិយាយថា លោក Bolsonaro កំពុងត្រូវក្លាយទៅជា «ជនរងគ្រោះដោយសារការទម្លាក់កំហុស» ដោយ «ប្រព័ន្ធអយុត្តិធម៌»។