សហរដ្ឋអាមេរិកកាលពីថ្ងៃសុក្រ បានច្រានចោលជាផ្លូវការនូវការផ្លាស់ប្តូរចំពោះវិធានការឆ្លើយតបទៅនឹងជំងឺរាតត្បាតរបស់អង្គការសុខភាពពិភពលោក ដោយរដ្ឋបាលរបស់លោកប្រធានាធិបតី Donald Trump បាននិយាយថា វិធានការនេះបានរំលោភលើអធិបតេយ្យភាពជាតិ។

សេចក្តីសម្រេចនេះធ្វើឡើងប៉ុន្មានខែបន្ទាប់ពីលោក Trump បានចាប់ផ្តើមដំណើរការដកសហរដ្ឋអាមេរិកចេញពីស្ថាប័នសុខភាពរបស់អង្គការសហប្រជាជាតិនៅពេលលោកត្រឡប់ចូលមកកាន់តំណែងវិញកាលពីខែមករា។ ទោះបីជាមានការដកខ្លួនក៏ដោយ ក្រសួងការបរទេសបាននិយាយថា ភាសានៅក្នុងកំណែទម្រង់ដែលបានអនុម័តកាលពីឆ្នាំមុន នឹងនៅតែជាប់កាតព្វកិច្ចនៅលើទឹកដីសហរដ្ឋអាមេរិក។

នៅក្នុងសេចក្តីថ្លែងការណ៍រួម រដ្ឋមន្ត្រីការបរទេសលោក Marco Rubio និងរដ្ឋមន្ត្រីក្រសួងសុខភិបាលនិងប្រជាសេវា លោក Robert F Kennedy បាននិយាយថា វិសោធនកម្ម «ប្រឈមនឹងការជ្រៀតជ្រែកដោយពុំមានការធានាចំពោះសិទ្ធិអធិបតេយ្យជាតិរបស់យើងក្នុងការបង្កើតគោលនយោបាយសុខាភិបាល»។

សេចក្តីថ្លែងការណ៍និយាយថា «យើងនឹងដាក់ពលរដ្ឋអាមេរិកជាអាទិភាពក្នុងរាល់សកម្មភាពរបស់យើង ហើយយើងនឹងមិនអត់ឱនចំពោះគោលនយោបាយអន្តរជាតិដែលបំពានលើការនិយាយស្តី ឯកជនភាព ឬសេរីភាពផ្ទាល់ខ្លួនរបស់ពលរដ្ឋអាមេរិកឡើយ»។

លោក Rubio និង លោក Kennedy បាននិយាយថាសហរដ្ឋអាមេរិក កំពុងផ្តាច់ខ្លួនចេញពីការធ្វើវិសោធនកម្មជាបន្តបន្ទាប់ចំពោះបទប្បញ្ញត្តិសុខភាពអន្តរជាតិ ដែលផ្តល់មូលដ្ឋានច្បាប់សម្រាប់ការសម្របសម្រួលជាសកលក្នុងអំឡុងពេលមានការផ្ទុះជំងឺឡើង។ ការផ្លាស់ប្តូរដែលបានអនុម័តកាលពីឆ្នាំមុនដោយសន្និបាតសុខភាពពិភពលោកនៅទីក្រុងហ្សឺណែវ រួមមានការប្តេជ្ញាចិត្តចំពោះ «សាមគ្គីភាព និងសមភាព» និងការបង្កើតយន្តការវាយតម្លៃតម្រូវការរបស់ប្រទេសកំពុងអភិវឌ្ឍន៍ក្នុងអំឡុងពេលមានអាសន្នសុខភាពសកល។