ការប្រយុទ្ធគ្នាយ៉ាងខ្លាំងក្លាបានផ្ទុះឡើងម្តងទៀតរវាងក្រុមជនជាតិភាគតិចDruze និងកុលសម្ព័ន្ធ Bedouin នៅក្នុងខេត្ត Suwayda ភាគខាងត្បូងប្រទេសស៊ីរី ប៉ុន្មានម៉ោងមុនពេលមានរបាយការណ៍អំពីកិច្ចព្រមព្រៀងបទឈប់បាញ់ជាមួយអ៊ីស្រាអែល។

បន្ទាប់ពីមានការបន្តឡើងវិញការប៉ះទង្គិចគ្នាកាលពីថ្ងៃសុក្រ ការិយាល័យប្រធានាធិបតីស៊ីរី បាននិយាយថា អាជ្ញាធរនឹងដាក់ពង្រាយកងកម្លាំងដើម្បីស្តារឡើងវិញភាពស្ងប់ស្ងាត់នៅខេត្តដែលមានជនជាតិភាគតិច Druze រស់នៅច្រើន។

លោកប្រធានាធិបតី បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃសុក្រថា «ស្ថាប័នពិសេសរបស់រដ្ឋ នឹងធ្វើការដាក់ពង្រាយកងកម្លាំងដើម្បីកាត់បន្ថយការប៉ះទង្គិចគ្នាដែលកាន់តែធ្ងន់ធ្ងរ និងដោះស្រាយជម្លោះតាមរយៈវិធានការនយោបាយនិងសន្តិសុខក្នុងគោលបំណងស្តារស្ថិរភាព និងទប់ស្កាត់ការវិលត្រឡប់មកវិញនៃភាពវឹកវរឱ្យបានលឿនតាមដែលអាចធ្វើទៅបាន»។

ភ្លាមៗនោះ ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសទួរគី លោក Tom Barrack បាននិយាយថា អ៊ីស្រាអែល និងស៊ីរី បានព្រមព្រៀងលើបទឈប់បាញ់ដែលគាំទ្រដោយប្រទេសទួរគី ហ្ស៊កដានី និងប្រទេសជិតខាងផ្សេងទៀត។

អ៊ីស្រាអែលកាលពីថ្ងៃពុធសប្តាហ៍នេះ បានធ្វើការវាយប្រហារតាមអាកាសយ៉ាងខ្លាំងលើខេត្ត Suwayda និងរដ្ឋធានីដាម៉ាស របស់ប្រទេសស៊ីរី ដោយអះអាងថា ខ្លួនត្រូវការពារជនជាតិភាគតិច Druze។ ទីក្រុងដាម៉ាស បានថ្កោលទោសការវាយប្រហាររបស់អ៊ីស្រាអែលថាជាការរំលោភលើដែនអធិបតេយ្យភាពប្រទេសស៊ីរី និងជាការប៉ុនប៉ងបណ្តុះការខ្វែងគំនិតគ្នានិងភាពវឹកវរក្នុងប្រទេស។