ហៃទី៖ នគរបាលបាននិយាយកាលពីថ្ងៃសុក្រថា អ្នកសារព័ត៌មានជនជាតិហៃទី ២នាក់ត្រូវបានសម្លាប់ដោយសមាជិកក្រុមជនអន្ធពាល ខណៈពេលដែលកំពុងរាយការណ៍នៅជិតរដ្ឋធានីព័រអូប្រាំង (Port-au-Prince) ដែលការកើនឡើងអំពើហិង្សានៅតែបន្តរង្គោះរង្គើនៅប្រទេសមួយនេះ។ នាយករបស់អ្នកសារព័ត៌មានម្នាក់ និងរបាយការណ៍ប្រព័ន្ធផ្សព្វផ្សាយមួយចំនួនបាននិយាយថា បុរសទាំងពីរនាក់នេះត្រូវបានបាញ់បន្ទាប់មកដុតទាំងរស់ ប៉ុន្តែនគរបាលនៅប្រទេសហៃទីមិនបានបញ្ជាក់ពីរឿងនេះនោះទេ។
សេចក្តីថ្លែងការណ៍របស់នគរបាលបាននិយាយថា សាកសពរងគ្រោះដោយគ្រាប់កាំភ្លើង។ ប្រព័ន្ធផ្សព្វផ្សាយបាននិយាយថា អ្នកសារព័ត៌មានលោក John Wesley Amady ត្រូវបានសម្លាប់ដោយក្រុមចោរព្រៃប្រដាប់អាវុធកាលពីថ្ងៃព្រហស្បតិ៍ ខណៈដែលលោកកំពុងរាយការណ៍អំពីបញ្ហាសន្តិសុខនៅក្នុងតំបន់ដែលមានក្រុមជនអន្ធពាល។ សេចក្តីរាយការណ៍ដំបូងនិយាយថា អ្នកសារព័ត៌មាន ៣នាក់បានទៅកន្លែងកើតហេតុ ហើយ ២នាក់ត្រូវបានសម្លាប់ ចំណែកអ្នកទី៣ បានរត់គេចខ្លួន។ នៅទីក្រុងញូវយ៉ក អ្នកនាំពាក្យរបស់អង្គការសហប្រជាជាតិលោក Stephane Dujarric បាននិយាយថា ពួកគេត្រូវបានសម្លាប់ដោយគ្មានទោស សម្រាប់សកម្មភាពគ្រាន់តែព្យាយាមបង្ហាញពីការពិត។ នាយករដ្ឋមន្ត្រីហៃទីលោក Ariel Henry បានប្តេជ្ញាបង្ក្រាបក្រុមជនអន្ធពាល ដែលអាជ្ញាធរត្រូវបានដាក់កំហុសចំពោះការរាលដាលនៃការចាប់ជំរិត និងសម្រាប់ការបិទស្ថានីយចែកចាយហ្គាស ក្នុងសកម្មភាពដែលបណ្តាលឱ្យមានការខ្វះខាតប្រេងឥន្ធនៈធ្ងន់ធ្ងរកាលពីប៉ុន្មានខែថ្មីៗនេះ ខណៈសហរដ្ឋអាមេរិក និងកាណាដាបានជំរុញឲ្យពលរដ្ឋរបស់ខ្លួនចាកចេញពីប្រទេសហៃទី៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
