អាជ្ញាធរបានប្រាប់ឲ្យដឹងថា ភ្លៀងធ្លាក់ខ្លាំង ដែលបានកើតមានពាសពេញប្រទេសកូរ៉េខាងត្បូងរយៈពេល ៤ថ្ងៃហើយ ដល់ថ្ងៃសៅរ៍ (ទី១៩ ខែកក្កដា) នេះ ធ្វើឲ្យមនុស្សជិត ៣.០០០នាក់ មិនអាចវិលត្រលប់ទៅផ្ទះសម្បែងរបស់ពួកគេវិញបាន ខណៈដែលបសុសត្វត្រូវបានលិចរហូតដល់កនៅក្នុងទឹកដែលកំពុងឡើងខ្លាំងទៅៗ ស្របពេលដែលចំនួនអ្នកស្លាប់ បានកើនឡើងដល់ ៤នាក់ ហើយ ២នាក់ទៀតកំពុងបាត់ខ្លួន។

មន្ត្រីឧតុនិយមបានប្រាប់ថា ភ្លៀងនឹងបន្តមានរហូតដល់ថ្ងៃទី២១ ខែកក្កដា នៅតាមតំបន់មួយចំនួន ខណៈបានជំរុញឲ្យមានការប្រុងប្រយ័ត្នខ្ពស់ ចំពោះហានិភ័យពីការមានបំណាក់ដី និងទឹកជំនន់ ដោយចេញការព្រមាននៅទូទាំងតំបន់ភាគច្រើននៃប្រទេស។

ចំណែកក្រសួងមហាផ្ទៃបានឲ្យដឹងថា គិតត្រឹមម៉ោង ៦ព្រឹក ថ្ងៃទី១៩ ខែកក្កដានេះ មនុស្សចំនួន ២.៨១៦នាក់ នៅតែស្នាក់នៅក្រៅផ្ទះសម្បែងរបស់ពួកគេនៅឡើយ ដោយពួកគេជាផ្នែកនៃចំនួនសរុបជាង ៧.០០០នាក់ ដែលត្រូវបានជម្លៀស ក្នុងអំឡុងថ្ងៃភ្លៀងធ្លាក់ខ្លាំងមុននេះ ដែលក្នុងនោះមនុស្ស ៤នាក់ស្លាប់ និង ២នាក់កំពុងបាត់ខ្លួន។

ក្រសួងបានបន្ថែមថា ភ្លៀងធ្លាក់ តាំងពីថ្ងៃទី១៦ ខែកក្កដា បានឈានដល់កំណត់ត្រាលើសពីកម្រិត ៥០០មីលីម៉ែត្រ នៅទីក្រុង Seosan ក្នុងខេត្ត South Chungcheong ភាគខាងត្បូងនៃរដ្ឋធានីសេអ៊ូល។

កន្លែងផ្សេងទៀតក្នុងខេត្តនេះ សត្វគោកំពុងប្រឹងអើតក្បាលឲ្យផុតពីទឹក បន្ទាប់ពីរោង និងក្រោលត្រូវបានជន់លិច។ ក្រសួងបានបញ្ជាក់ថា ការខូចខាតដោយទឹកជំនន់ មានសំណង់ជាង ៦៤១អគារ ផ្លូវ ៣៨៨ខ្សែ និងកសិដ្ឋាន ៥៩កន្លែង៕