រដ្ឋាភិបាលអូស្ត្រាលី នៅថ្ងៃសៅរ៍ (ទី១៩ ខែកក្កដា) នេះ បានប្រាប់ឲ្យដឹងថា ខ្លួនបានប្រគល់រថក្រោះ M1A1 Abrams ទៅឲ្យអ៊ុយក្រែន ដែលជាផ្នែកនៃកញ្ចប់ជំនួយចំនួន ២៤៥លានដុល្លារអូស្ត្រាលី (១៦០លានដុល្លារ) ដើម្បីជួយទីក្រុងគីវការពារខ្លួនទប់ទល់នឹងរុស្ស៊ី នៅក្នុងសង្គ្រាមដែលកំពុងបន្តមាន។

អូស្ត្រាលីដែលជាប្រទេសមួយ ក្នុងចំណោមអ្នកបរិច្ចាគដ៏ធំបំផុតមិនមែនសមាជិករបស់អង្គការណាតូ (NATO) សម្រាប់អ៊ុយក្រែន បាននិងកំពុងផ្គត់ផ្គង់ជំនួយ គ្រាប់រំសេវ និងគ្រឿងយុទ្ធោបករណ៍នានា ចាប់តាំងពីទីក្រុងមូស្គូបានលុកលុយប្រទេសជិតខាងរបស់ខ្លួន ក្នុងខែកុម្ភៈ ឆ្នាំ២០២២។

រដ្ឋមន្ត្រីក្រសួងការពារជាតិ លោក Richard Marles បាននិយាយថា អ៊ុយក្រែនបានទទួលបានរថក្រោះជាច្រើនគ្រឿង ក្នុងចំណោមចំនួន ៤៩គ្រឿងដែលអូស្ត្រាលីផ្ដល់ឲ្យ ដោយចំនួននៅសល់នឹងត្រូវបានបញ្ជូនទៅ ក្នុងប៉ុន្មានខែខាងមុខនេះ។

លោក Marles បានឲ្យដឹងនៅក្នុងសេចក្តីថ្លែងការណ៍មួយថា៖ «រថក្រោះ M1A1 Abrams នឹងចូលរួមចំណែកយ៉ាងសំខាន់ ក្នុងការជួយឲ្យអ៊ុយក្រែនបន្តប្រយុទ្ធប្រឆាំងនឹងការឈ្លានពានខុសច្បាប់ និងអសីលធម៌របស់រុស្ស៊ី»។

រដ្ឋាភិបាលបានបញ្ជាក់ថា រថក្រោះទាំងនេះបានក្លាយជាផ្នែកនៃជំនួយគិតជាទឹកប្រាក់ចំនួន ១,៥ពាន់លានដុល្លារអូស្ត្រាលី ដែលទីក្រុងកង់បេរ៉ាបានផ្តល់ឲ្យអ៊ុយក្រែន អំឡុងពេលមានជម្លោះនេះ៕