អតីតប្រធានាធិបតីកូរ៉េខាងត្បូង លោក Yoon Suk Yeol ត្រូវបានចោទប្រកាន់ផ្លូវការ ពីបទចោទបន្ថែម នៅថ្ងៃសៅរ៍ (ទី១៩ ខែកក្កដា) នេះ ខណៈដែលរដ្ឋអាជ្ញាពិសេសបន្តស៊ើបអង្កេតរូបលោក ពាក់ព័ន្ធនឹងការប្រកាសច្បាប់អាជ្ញាសឹករយៈពេលខ្លីរបស់លោក កាលពីខែធ្នូឆ្នាំមុន។

ការិយាល័យរបស់រដ្ឋអាជ្ញា បានឲ្យដឹងនៅក្នុងសន្និសីទសារព័ត៌មានថា ការចោទប្រកាន់ថ្មីនេះ រួមមានការរារាំងការអនុវត្តសិទ្ធិរបស់អ្នកដទៃ ដោយការរំលោភសិទ្ធិអំណាច បញ្ជាឲ្យលុបកំណត់ត្រា និងការរារាំងការអនុវត្តដីកាចាប់ខ្លួន។

គួរបញ្ជាក់ថា លោក Yoon ត្រូវបានកាត់ទោស ជុំវិញការចោទប្រកាន់ពីបទបះបោរ ដែលត្រូវផ្តន្ទាទោសប្រហារជីវិត ឬដាក់ពន្ធនាគារអស់មួយជីវិត ដោយប្រឈមនឹងការចោទប្រកាន់បន្ថែម ចាប់តាំងពីរដ្ឋអាជ្ញាពិសេស ត្រូវបានតែងតាំង កាលពីខែមិថុនា ដើម្បីទទួលខុសត្រូវលើសំណុំរឿងប្រឆាំងនឹងរូបលោក។

អតីតមេដឹកនាំរបស់កូរ៉េខាងត្បូងរូបនេះ បានបដិសេធមិនបានធ្វើអ្វីខុសទាំងអស់។ មេធាវីរបស់លោក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងបទចោទថ្មីនេះ។

អតីតមេដឹកនាំដែលត្រូវបានចោទប្រកាន់ និងទម្លាក់ចេញពីតំណែង ត្រូវបានចាប់ដាក់ពន្ធនាគារ នៅមជ្ឈមណ្ឌលឃុំឃាំងទីក្រុងសេអ៊ូល តាំងពីដើមខែកក្កដា ហើយតុលាការនៅដើមសប្តាហ៍នេះ បានច្រានចោលសំណើសុំដោះលែងឲ្យនៅក្រៅឃុំ៕