ប្រធានាធិបតីអាមេរិក លោក Donald Trump កាលពីថ្ងៃសុក្រ (ទី១៨ ខែកក្កដា) បានរំលឹកឡើងវិញជាថ្មីម្តងទៀតនូវការគំរាមកំហែងរបស់លោក ក្នុងការដាក់អត្រាពន្ធ ១០ភាគរយលើការនាំចូលពីសមាជិកនៃក្រុមប្រទេសកំពុងអភិវឌ្ឍន៍ BRICS ហើយបាននិយាយថា ក្រុមនេះនឹងដួលរលំយ៉ាងឆាប់រហ័ស ប្រសិនបើប្លុកនេះត្រូវបានបង្កើតឡើង ដើម្បីបង្កឥទ្ធិពលនោះ។

ដោយមិនបានបញ្ចេញឈ្មោះបណ្ដាប្រទេសទាំងនោះចំៗ លោក Trump បាននិយាយថា៖ «នៅពេលដែលខ្ញុំបានឮអំពីក្រុមនេះ មកពីប្លុក BRICS ដោយមានប្រទេសចំនួន ៦ ជាមូលដ្ឋាន ខ្ញុំបានឆ្លើយតបចំពោះប្រទេសទាំងនោះយ៉ាងខ្លាំងក្លា ហើយប្រសិនបើពួកគេពិតជាបង្កើតឡើង ដើម្បីបង្កឥទ្ធិពលនោះ ប្លុកនេះនឹងបញ្ចប់ទៅវិញយ៉ាងឆាប់រហ័ស។ យើងមិនអាចឲ្យអ្នកណាម្នាក់លេងហ្គេមជាមួយយើងបានទេ»។

ជាមួយគ្នានេះ លោក Trump ក៏បានលើកឡើងផងដែរថា លោកបានប្តេជ្ញារក្សាស្ថានភាពសកលរបស់ប្រាក់ដុល្លារ ក្នុងនាមជារូបិយប័ណ្ណបម្រុង និងបានសន្យាថា នឹងមិនអនុញ្ញាតឲ្យមានការបង្កើតរូបិយប័ណ្ណឌីជីថលរបស់ធនាគារកណ្តាល នៅអាមេរិកឡើយ។ មេដឹកនាំអាមេរិកបានប្រកាសពន្ធថ្មី កាលពីថ្ងៃទី៦ ខែកក្កដា ដោយបញ្ជាក់ថា វិធានការនេះនឹងអនុវត្តចំពោះប្រទេសណាមួយ ដែលសម្របខ្លួនជាមួយនឹងអ្វីដែលលោកហៅថា «គោលនយោបាយប្រឆាំងអាមេរិក» របស់ក្រុម BRICS ។

ដោយវេទិកានានា ដូចជាវេទិកានៃបណ្ដាប្រទេសមានឧស្សាហកម្មឈានមុខគេនៃប្លុក G7 និង G20 ជាដើម ជួបនឹងភាពតានតឹងដោយសារការខ្វែងគំនិតគ្នា និងការរំខានពីគោលនយោបាយ «America First» (អាមេរិកទី១) របស់ប្រធានាធិបតីអាមេរិក ក្រុមប្រទេស BRICS កំពុងបង្ហាញខ្លួនឯងថា ជាទីកន្លែងដ៏មានសុវត្ថិភាព សម្រាប់ការទូតពហុភាគី។

ចាប់តាំងពីចេញការគំរាមកំហែង លោក Trump បានអះអាងម្តងហើយម្តងទៀតដោយគ្មានភស្តុតាងថា ក្រុមនេះត្រូវបានបង្កើតឡើង ដើម្បីធ្វើឲ្យប៉ះពាល់ដល់សហរដ្ឋអាមេរិក និងតួនាទីរបស់ប្រាក់ដុល្លារដែលជារូបិយប័ណ្ណបម្រុងរបស់ពិភពលោក។ បណ្ដាមេដឹកនាំ BRICS បានច្រានចោលការអះអាង ដែលថា ក្រុមនេះ កំពុងប្រឆាំងអាមេរិក៕