ប្រទេសចិន នៅថ្ងៃសោរ៍ (ទី១៩ ខែកក្កដា) នេះ បានប្ដេជ្ញាបង្កើនការបង្រ្កាប និងពង្រឹងការអនុវត្តច្បាប់ប្រឆាំងនឹងការរត់ពន្ធរ៉ែយុទ្ធសាស្ត្រ ដែលត្រូវបានចាត់ទុកថា មានសារៈសំខាន់ សម្រាប់សន្តិសុខជាតិ និងសម្រាប់ការអភិវឌ្ឍ។

ការកត់សម្គាល់របស់ក្រសួងពាណិជ្ជកម្មនេះ បានកើតមានឡើងមួយថ្ងៃបន្ទាប់ពីក្រសួងសន្តិសុខរដ្ឋ បានចោទប្រកាន់ភ្នាក់ងារចារកម្មបរទេសថា បានព្យាយាម «លួច« រ៉ែកម្រ និងបានសន្យាថា នឹងបង្ក្រាបលើការជ្រៀតចូល និងចារកម្មដែលផ្តោតលើវិស័យដ៏សំខាន់នេះ។

ក្នុងនាមជាអ្នកផ្គត់ផ្គង់ដ៏ធំបំផុតរបស់ពិភពលោកនូវរ៉ែយុទ្ធសាស្ត្ររាប់សិបមុខ ប្រទេសចិនបានចាប់ផ្តើមទប់ស្កាត់ការនាំចេញនៅឆ្នាំ២០២៣ លើការផ្គត់ផ្គង់សំខាន់ៗ សម្រាប់វិស័យនានា រាប់ចាប់ពីការផលិតបន្ទះឈីប និងការផ្លាស់ប្តូរការប្រើប្រាស់ថាមពល រហូតដល់វិស័យការពារជាតិ។

ការលើកឡើងរបស់ក្រសួងពាណិជ្ជកម្ម ដែលពណ៌នាការរត់ពន្ធ និងការនាំចេញរ៉ែយុទ្ធសាស្ត្រថា ជាបញ្ហាធ្ងន់ធ្ងរត្រូវដោះស្រាយនោះ បានធ្វើឡើងនៅក្នុងកិច្ចប្រជុំមន្ត្រីទទួលបន្ទុកសម្របសម្រួលត្រួតពិនិត្យការនាំចេញ និងស្ថាប័នរដ្ឋាភិបាលដទៃទៀត។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា៖ «ករណីនៃការរត់ពន្ធដោយឧក្រិដ្ឋជនមួយចំនួនតូច ដើម្បីតែផលប្រយោជន៍ផ្ទាល់ខ្លួនរបស់ពួកគេ និងការឃុបឃិតគ្នា រវាងភាគីក្នុងស្រុក និងបរទេស នៅតែកើតឡើងដដែល»។

ក្រសួងបានបន្ថែមថា វិធីសាស្រ្តគេចវេស ដូចជាការប្រកាសមិនពិត និងការដឹកបញ្ជូនឆ្លងកាត់ប្រទេសទី៣ កំពុងមានទម្រង់សម្ងាត់កាន់តែខ្លាំងឡើងៗ ដោយជំរុញឲ្យស្ថាប័នរដ្ឋាភិបាលទប់ស្កាត់ការហូរចេញដោយខុសច្បាប់នៃធនធានរ៉ែយុទ្ធសាស្ត្រ និងបច្ចេកវិទ្យាពាក់ព័ន្ធ។

ក្រសួងបានសង្កត់ធ្ងន់ថា ប្រទេសចិនបានអនុវត្តវិធីសាស្រ្ត «មិនលើកលែង» ចំពោះការរត់ពន្ធ និងការនាំចេញរ៉ែយុទ្ធសាស្ត្រ ដែលស្ថាប័ននឹងចាត់វិធានការយ៉ាងតឹងរ៉ឹងបំផុត តាមរយៈកិច្ចប្រឹងប្រែងពិសេស ដើម្បីពង្រឹងការអនុវត្តច្បាប់៕