ប្រធានាធិបតីអាមេរិក លោក Donald Trump កាលពីថ្ងៃសៅរ៍ ទី១៩ ខែកក្កដា បានទទូចថា ការទម្លាក់គ្រាប់បែករបស់សហរដ្ឋអាមេរិក ទៅលើទីតាំងនុយក្លេអ៊ែរអ៊ីរ៉ង់ "បានបំផ្លាញទាំងស្រុង" បន្ទាប់ពីរបាយការណ៍មួយបាននិយាយថា ទីតាំងមួយចំនួនបានរួចផុតពីការកម្ទេច។

នៅលើវេទិកាសង្គម Truth Social របស់លោក លោក Trump បានរំលឹកឡើងវិញនូវការអះអាងជាញឹកញាប់របស់លោកថា "ទីតាំងនុយក្លេអ៊ែរទាំងបីនៅក្នុងប្រទេសអ៊ីរ៉ង់ត្រូវបានកម្ទេចចោលទាំងស្រុង។

លោកបាននិយាយថា អ៊ីរ៉ង់នឹងចំណាយពេលជាច្រើនឆ្នាំទំម្រាំដំណើរការឡើងវិញ ហើយប្រសិនបើអ៊ីរ៉ង់ចង់ធ្វើដូច្នេះ ប្រៀបបាននឹងពួកគេចាប់ផ្ដើមឡើងជាថ្មី នៅក្នុងទីតាំងបីផ្សេងគ្នា។

ការវាយប្រហារដោយគ្រាប់បែក និងមីស៊ីលរបស់អាមេរិក បានវាយលុកកម្មវិធីនុយក្លេអ៊ែរដ៏ចម្រូងចម្រាសរបស់អ៊ីរ៉ង់កាលពីថ្ងៃទី ២២ ខែមិថុនា ដោយវាយលុកកន្លែងចម្រាញ់សារធាតុអ៊ុយរ៉ានីញ៉ូមនៅទីតាំងនុយក្លេអ៊ែរ Fordow ភាគខាងត្បូងនៃទីក្រុង តេអេរ៉ង់ ក៏ដូចជាទីតាំងនុយក្លេអ៊ែរនៅ Isfahan និង Natanz ។   

ការទម្លាក់គ្រាប់បែកដែលធ្វើឡើងក្នុងពេលដំណាលគ្នានឹងយុទ្ធនាការរបស់អ៊ីស្រាអែលប្រឆាំងនឹងនុយក្លេអ៊ែរ និងហេដ្ឋារចនាសម្ព័ន្ធយោធារបស់អ៊ីរ៉ង់ ត្រូវបានក្រុងវ៉ាស៊ីនតោនចាត់ទុកថាជាការវាយលុកដល់កិច្ចខិតខំប្រឹងប្រែងសម្ងាត់អស់រយៈពេលជាច្រើនឆ្នាំដើម្បីផលិតអាវុធនុយក្លេអ៊ែរ៕