ក្រុមជួយសង្គ្រោះឥណ្ឌូនេស៊ី បាននិយាយនៅថ្ងៃចន្ទ (២១ កក្កដា) នេះថា មនុស្សជាង ៥៦០នាក់ ត្រូវជួយសង្គ្រោះ និងជម្លៀសចេញពីសាឡាងដឹកអ្នកដំណើរមួយគ្រឿង ដែលឆាបឆេះនៅកណ្ដាលសមុទ្រ ហើយមនុស្ស ៣នាក់បានស្លាប់។ ប្រតិបត្តិការស្វែងរក និងជួយសង្គ្រោះកំពុងបន្ត ប៉ុន្តែមិនមានរបាយការណ៍ភ្លាមៗពីមនុស្សបាត់ខ្លួននោះទេ ខណៈក៏មិនទាន់ដឹងពីមូលហេតុឆេះដែរ។

ដំបូងឡើយអាជ្ញាធរនិយាយថា មនុស្ស ៥នាក់បានស្លាប់ ប៉ុន្តែទីភ្នាក់ងារស្វែងរក និងសង្គ្រោះជាតិកែប្រែតួលេខមកត្រឹមអ្នកស្លាប់ ៣នាក់ នៅព្រឹកថ្ងៃចន្ទនេះ បន្ទាប់ពីអ្នកដំណើរ ២នាក់ ដែលដំបូងត្រូវរាយការណ៍ថាស្លាប់ ត្រូវបានជួយសង្គ្រោះឱ្យរួចជីវិតវិញនៅក្នុងមន្ទីរពេទ្យ។

ប្រធានមូលដ្ឋានទ័ពជើងទឹកក្នុងតំបន់បានឱ្យដឹងថា សាឡាងឈ្មោះ KM Barcelona 5 បានឆាបឆេះនៅពាក់កណ្តាលថ្ងៃអាទិត្យ ពេលកំពុងធ្វើដំណើរទៅកាន់ទីក្រុង Manado នៃខេត្ត North Sulawesi របស់ឥណ្ឌុនេស៊ី ក្នុងការធ្វើដំណើររយៈពេលកន្លះថ្ងៃចេញពីកំពង់ផែ Melonguane ក្នុងប្រជុំកោះ Talaud ខេត្តដដែលនេះ។

កងកម្លាំងឆ្មាំល្បាតឆ្នេរ និងបុគ្គលិកសង្រ្គោះ បានជួយមនុស្សជាច្រើនចេញពីសមុទ្រ និងនាំពួកគេទៅកាន់កោះក្បែរនោះ ហើយអ្នកនេសាទក្នុងតំបន់ក៏បានជួយសង្គ្រោះអ្នកធ្លាក់ទឹកមួយចំនួន។ ការបញ្ជាក់របស់សាឡាងដំបូង បានចុះបញ្ជីអ្នកដំណើរត្រឹម ២៨០នាក់ប៉ុណ្ណោះ និងសមាជិកបុគ្គលិក ១៥នាក់ ប៉ុន្តែទីភ្នាក់ងារសង្គ្រោះជាតិបញ្ជាក់ថា មនុស្ស ៥៦៨នាក់ត្រូវជួយសង្គ្រោះ ហើយរកឃើញសាកសពអ្នកស្លាប់ ៣នាក់៕