ព្យុះទីហ្វុង Wipha បន្តឈានទៅដល់ការលុបចោលជើងហោះហើរ បន្ទាប់ពីបានជះឥទ្ធិពលយ៉ាងធ្ងន់ធ្ងរដល់ទីក្រុងហុងកុង ភាគខាងត្បូងប្រទេសចិន វៀតណាម កោះតៃវ៉ាន់ និងហ្វីលីពីន ដែលបណ្តាលឱ្យមានការរំខានយ៉ាងខ្លាំងក្នុងការធ្វើដំណើរ និងលក្ខខណ្ឌអាកាសធាតុមិនល្អ។ ដោយចាប់ផ្តើមក្លាយជាព្យុះត្រូពិក ព្យុះ Wipha មានកម្លាំងកាន់តែខ្លាំង ក្លាយជាព្យុះទីហ្វុង ដែលជំរុញឱ្យមានវិធានការសង្គ្រោះបន្ទាន់នៅទូទាំងតំបន់ដែលរងផលប៉ះពាល់។ ការមកដល់ជាច្រើនបានពន្យារពេល ឬលុបចោលនៅទូទាំងតំបន់ផ្សេងៗ។ 

យោងតាមគេហទំព័ររបស់ពួកគេបានឲ្យដឹងថា អាកាសយានដ្ឋានក្នុងទីក្រុងហុងកុង ហ្សិនជិន (Shenzhen) ជូហៃ (Zhuhai) និងមជ្ឈមណ្ឌលកាស៊ីណូម៉ាកាវ បានលុបចោល ឬពន្យារពេលជើងហោះហើរជាច្រើនថ្ងៃ។ ទូរទស្សន៍ RTHK បាននិយាយថា ហុងកុងបានផ្អាកជើងហោះហើរយ៉ាងហោចណាស់ ៤០០ ដែលប៉ះពាល់ដល់អ្នកដំណើរប្រហែល៨០.០០០នាក់។សេវារថភ្លើងល្បឿនលឿនមួយចំនួនក៏ត្រូវបានផ្អាកផងដែរ។

ព្យុះដែលឈានដល់កម្លាំងព្យុះទីហ្វុងពេញមួយយប់ ក្រោយមកបានបោកបក់ចេញពីទីក្រុងម៉ាកាវ ហើយត្រូវបានគេព្យាករណ៍ថានឹងបោកបក់ទៅលើឆ្នេរសមុទ្ររបស់ប្រទេសចិនកាលពីល្ងាចថ្ងៃអាទិត្យ។ គេរំពឹងថាព្យុះនេះនឹងបោះពួយទៅដល់ប្រទេសវៀតណាមនៅចុងសប្តាហ៍នេះ។

នៅប្រទេសហ្វីលីពីន ព្យុះនេះបាននាំមកនូវភ្លៀងធ្លាក់ខ្លាំងតាមរដូវមូសុង ដែលបណ្តាលឱ្យអ្នកភូមិ ម្នាក់ស្លាប់ដោយសារទឹកជំនន់នៅខេត្ត Cagayan ភាគខាងជើង ប្រទេសនេះ។

ក្រុមមន្ត្រីបាននិយាយថា មនុស្សជាង៣៧០.០០០នាក់ ត្រូវបានរងផលប៉ះពាល់ដោយអាកាសធាតុគ្របដណ្ដប់ដោយព្យុះជាច្រើនថ្ងៃ រួមទាំង៤៣.០០០នាក់ ដែលបានភៀសខ្លួនទៅកាន់ជម្រកសង្គ្រោះបន្ទាន់គ្រប់គ្រងដោយរដ្ឋាភិបាលក្នុងប្រទេសហ្វីលីពីន ឬផ្ទះរបស់សាច់ញាតិដោយសារតែទឹកជំនន់ បំណាក់ដី និងខ្យល់បក់យ៉ាងខ្លាំង។លំនៅឋានជាង ៤០០ខ្នងបានរងការខូចខាត៕