រយៈពេលប្រាំមួយខែក្នុងអាណត្តិទីពីរ លោកប្រធានាធិបតីអាមេរិក Donald Trump បានវាតទីពន្ធគយដ៏ខ្ពស់របស់លោកដាក់លើពិភពលោក ដែលបង្កភាពមិនប្រាកដប្រជាគ្រប់ដណ្ដប់សេដ្ឋកិច្ចសកល។ ចាប់ពីប្រទេសចិន ទៅដល់ម៉ិកស៊ិក និងសហភាពអឺរ៉ុប លោក Trump បានបង្កើនភាពតានតឹងពាណិជ្ជកម្ម ជាមួយនឹងរលកដំឡើងពន្ធថ្មី ដោយបំពេញតាមការសន្យាយុទ្ធនាការរបស់លោក ប៉ុន្តែជំហានដ៏កម្រោលនេះបានបង្កភាពច្របូកច្របល់យ៉ាងខ្លាំងក្នុងទីផ្សារហិរញ្ញវត្ថុ និងខ្សែច្រវាក់ផ្គត់ផ្គង់ពិភពលោក។

ថ្ងៃអាទិត្យ ២០ កក្កដា កន្លងទៅគឺជាពេលវេលា ៦ខែនៃអាណត្តិទីពីររបស់លោក Trump ក្នុងកៅអីសេតវិមាន បន្ទាប់ពីចូលកាន់តំណែងនៅថ្ងៃទី២០ ខែមករា ឆ្នាំ២០២៥។ លោក Trump បានសរសេរលើបណ្ដាញសង្គម Truth Social នៅព្រឹកថ្ងៃអាទិត្យថា "ពេលវេលាដើរលឿនណាស់! ថ្ងៃអាទិត្យនេះជាគម្រប់ ៦ខែនៃអាណត្តិទីពីរទៅហើយ"។

ការផ្តោតជាថ្មីរបស់លោក Trump លើគោលនយោបាយសេដ្ឋកិច្ចគាំពារនិយមរបស់លោក បានបង្កប្រតិកម្មយ៉ាងខ្លាំងក្នុងទីផ្សារពិភពលោក តម្លៃទំនិញហក់ឡើង លោហៈដ៏មានតម្លៃនិងប្រេងកាន់តែប៉ះពាល់ខ្លាំង។ សង្គ្រាមពាណិជ្ជកម្មបានផ្ទុះឡើងដំបូងនៅខែមេសា ដោយលោក Trump ប្រកាសពន្ធ "បដិការ" ចន្លោះពី ១០% ទៅ ៥០% លើដៃគូពាណិជ្ជកម្មសកល តែក្រោយមកក៏ផ្អាកវិញ។ របាំងពន្ធថ្មីត្រូវរំពឹងថានឹងកើតឡើងនៅថ្ងៃទី០១ ខែសីហា ខាងមុខនេះ ប៉ុន្តែកាលបរិច្ឆេទដែលលោក Trump កំណត់នេះ ហាក់ដូចជាអាចប្រែប្រួល។

ក្រៅពីពន្ធសកលដ៏ខ្ពស់នោះ អន្តោប្រវេសន៍ ការចំណាយរបស់សហព័ន្ធ និងសង្រ្គាមក៏ស្ថិតនៅជួរមុខនៃរបៀបវារៈរបស់លោក Trump ផងដែរ។ ក្នុងពេល ៦ខែមកនេះ លោកបង្កើនការចាប់ខ្លួនជនអន្តោប្រវេសន៍សហព័ន្ធ ដោយបន្ទាបចំនួនឆ្លងព្រំដែនខុសច្បាប់ និងបង្កើនការឃុំខ្លួនមនុស្សគ្មានឯកសារក្នុងមន្ទីរឃុំឃាំងអាមេរិក ខណៈបង្កភាពចម្រូងសម្រាសជាច្រើនជុំវិញការឆ្មក់បបង្រ្កាបមិនបន្ធូរដៃនេះ៕