ក្រុមគ្រួសារចំណាប់ថ្នូរអ៊ីស្រាអែល ដែលត្រូវឃុំខ្លួននៅតំបន់ហ្កាហ្សាស្ទ្រីប កាលពីថ្ងៃអាទិត្យ (២០ កក្កដា) បានសម្តែងក្ដីបារម្ភកាន់តែខ្លាំងឡើងរបស់ពួកគេ ចំពោះរបាយការណ៍ដែលថាយោធាអ៊ីស្រាអែល កំពុងរៀបចំសម្រាប់ការវាយលុកថ្មីមួយនៅភាគកណ្តាលហ្កាហ្សា បន្ទាប់ពីបទបញ្ជាជម្លៀសជាលើកដំបូងដល់អ្នកស្រុកប៉ាឡេស្ទីនរាប់ម៉ឺននាក់ក្នុងតំបន់ Deir al-Balah។

ក្រុមគ្រួសារចំណាប់ថ្នូរទាំងនោះបាននិយាយរួមគ្នាក្នុងសេចក្តីថ្លែងការណ៍មួយថា "ពួកគេបារម្ភ និងភ័យខ្លាចណាស់ចំពោះរបាយការណ៍ដែលថា កងទ័ពមានបំណងពង្រីកប្រតិបត្តិការទៅកាន់តំបន់កណ្តាលហ្កាហ្សា ដែលរហូតមកដល់ពេលនេះ នៅមិនទាន់រងការប៉ះពាល់ពីសង្រ្គាមនៅឡើយ"។

ពួកគេបានអំពាវនាវឱ្យលោកនាយករដ្ឋមន្ត្រី Benjamin Netanyahu រដ្ឋមន្ត្រីការពារជាតិលោក Israel Katz និងមន្ត្រីយោធាជាន់ខ្ពស់ផ្សេងទៀត ពន្យល់ជាបន្ទាន់អំពីយុទ្ធសាស្ត្រប្រយុទ្ធដល់សាធារណៈជនអ៊ីស្រាអែល ហើយបញ្ជាក់ឱ្យច្បាស់ពីវិធីសាស្រ្តធានាសុវត្ថិភាពរបស់ចំណាប់ថ្នូរនៅហ្កាហ្សា ក្រោមគម្រោងពង្រីកប្រតិបត្តិការថ្មី។

ក្ដីកង្វល់កាន់តែជ្រៅឡើងនេះ បានកើតមានស្របពេលសង្រ្គាមអ៊ីស្រាអែល ប្រឆាំងនឹងក្រុមហាម៉ាស កំពុងតែបន្តយ៉ាងខ្លាំងក្លា ខណៈការប៉ុនប៉ងដើម្បីឈានដល់កិច្ចព្រមព្រៀងបទឈប់បាញ់ហាក់រអាក់រអួល ដែលនឹងអាចមើលឃើញមានការផ្អាកប្រយុទ្ធយ៉ាងហោចណាស់ជាបណ្តោះអាសន្ន ជាថ្នូរនឹងការដោះលែងចំណាប់ថ្នូរនៅរស់មួយចំនួនក្នុងចំណោម ២០នាក់ក្នុងដៃក្រុមហាម៉ាស និងសាកសពចំណាប់ថ្នូរ ៣០នាក់ផ្សេងទៀត៕