អរិភាពជាបន្តបន្ទាប់នៅភាគខាងត្បូងប្រទេសស៊ីរីដែលពាក់ព័ន្ធនឹងក្រុមកុលសម្ព័ន្ធ Bedouin និងជនជាតិភាគតិចឌ្រូស(Druze) ត្រូវបានគេរាយការណ៍ថាបានបណ្តាលឱ្យមនុស្សជាង១.០០០នាក់ស្លាប់។ ក្រុមឃ្លាំមើលសិទ្ធិមនុស្សស៊ីរីមានមូលដ្ឋាននៅចក្រភពអង់គ្លេស បាននិយាយកាលពីថ្ងៃអាទិត្យថាចំនួនអ្នកស្លាប់ដោយសារតែការប៉ះទង្គិចគ្នា និងការវាយប្រហារតាមអាកាសរបស់អ៊ីស្រាអែល ចាប់តាំងពីថ្ងៃទី១៣ ខែកក្កដា បានកើនឡើងដល់១.០១៧នាក់។

ក្រុមនេះនិយាយថា ពួកគេបានរាប់បញ្ចូលទាំងជនស៊ីវិល រួមមានទាំងស្ត្រី និងកុមារ។ នៅទីក្រុង Sweidaភាគខាងត្បូង ក្រុមកុលសម្ព័ន្ធBedouins និងជនជាតិភាគតិច Druze បានប៉ះទង្គិចគ្នាកាលពីសប្តាហ៍មុន ដែលជំរុញឱ្យរដ្ឋាភិបាលបណ្តោះអាសន្នរបស់ប្រទេសស៊ីរីដាក់ពង្រាយកងទ័ពដើម្បីធ្វើអន្តរាគមន៍។

អ៊ីស្រាអែល បានធ្វើការវាយប្រហារតាមអាកាសនៅភាគខាងត្បូងប្រទេសស៊ីរី និងរដ្ឋធានីដាម៉ាសរបស់ប្រទេស ដោយនិយាយថា ខ្លួនមានគោលបំណងការពារសហគមន៍ជនជាតិភាគតិច Druze ។ រដ្ឋាភិបាលបណ្តោះអាសន្ន បានប្រកាសបទឈប់បាញ់ដ៏ទូលំទូលាយនិងភ្លាមៗ កាលពីថ្ងៃសៅរ៍សប្តាហ៍កន្លងទៅនេះ។ ប៉ុន្តែក្រុមឃ្លាំមើលសិទ្ធិមនុស្សស៊ីរី បាននិយាយថា ការប៉ះទង្គិចគ្នាជាបន្តបន្ទាប់បានកើតឡើងនៅជាយក្រុងSweida កាលពីថ្ងៃអាទិត្យ។ កង្វះទឹកស្អាត អាហារ និងការផ្គត់ផ្គង់ផ្សេងៗទៀត ក៏ត្រូវបានរាយការណ៍ផងដែរ ជាសញ្ញានៃស្ថានភាពមនុស្សធម៌នៅទីនោះកាន់តែធ្លាក់ចុះយ៉ាប់យ៉ឺន។

រដ្ឋាភិបាលបណ្តោះអាសន្នបាននិយាយកាលពីថ្ងៃអាទិត្យថា ក្រុមប្រដាប់អាវុធដែលមានទំនាក់ទំនងជាមួយក្រុមជនជាតិភាគតិច Druze បានបដិសេធមិនឲ្យក្បួនរថយន្តដឹកជញ្ជូនជំនួយមនុស្សធម៌ចូលទៅកាន់តំបន់នោះ។ រដ្ឋាភិបាលនិយាយថាចំនួនរថយន្តដឹកជំនួយត្រូវបានកំណត់ក្នុងការអនុញ្ញាតឱ្យដំណើរការ។