អតីតរដ្ឋមន្ត្រីការពារជាតិអ៊ីស្រាអែល លោក Avigdor Lieberman បានចោទប្រកាន់លោកនាយករដ្ឋមន្ត្រី Benjamin Netanyahu កាលពីថ្ងៃអាទិត្យ (២០ កក្កដា) ថាកំពុងតែស្វះស្វែងអូសបន្លាយសង្រ្គាមដ៏បង្ហូរឈាមនៅដែនដីហ្កាហ្សា រហូតដល់ការបោះឆ្នោតបន្ទាប់។

លោក Lieberman មេដឹកនាំបក្សស្តាំនិយម Yisrael Beiteinu បាននិយាយថា សម្ពាធផ្ទៃក្នុងនឹងតម្រង់ទៅលើលោក Netanyahu បន្ទាប់ពីចំណាប់ថ្នុរដែលក្រុមហាម៉ាសចាប់ខ្លួនក្នុងខែតុលា ឆ្នាំ២០២៣ ត្រូវបានដោះលែងត្រឡប់មកវិញ ហើយសង្រ្គាមបានបញ្ចប់។

អតីតរដ្ឋមន្ត្រីរូបនេះមិនបានបញ្ជាក់ឡើយថា តើលោកសំដៅដល់ការបោះឆ្នោតបន្ទាប់ពីអាណត្តិរបស់លោក Netanyahu បញ្ចប់នៅខែធ្នូ ឆ្នាំ២០២៦ ឬក៏ការបោះឆ្នោតមុនកំណត់ដែលអាចនឹងធ្វើឡើងនៅចុងឆ្នាំ២០២៥ ឬដើមឆ្នាំ២០២៦ ខាងមុខនេះទេ។

លោក Lieberman បន្ថែមថា៖ គេមិនអាចកម្ចាត់ក្រុមហាម៉ាស ដោយមិនយកចំណាប់ថ្នូរទាំងអស់មកវិញជាមុនសិនបានឡើយ។ គួរឱ្យដឹងថា កិច្ចចរចាដោយប្រយោលបានចាប់ផ្តើមនៅថ្ងៃទី០៦ ខែកក្កដា នៅក្នុងរដ្ឋធានីដូហា ប្រទេសកាតា ដើម្បីឈានដល់កិច្ចព្រមព្រៀងមួយ ដែលរួមមានបទឈប់បាញ់ និងការផ្លាស់ប្តូរចំណាប់ថ្នូររវាងក្រុមហាម៉ាស និងអ៊ីស្រាអែល ប៉ុន្តែពុំទាន់មានលទ្ធផលធំដុំនៅឡើយ៕