រដ្ឋមន្ត្រីក្រសួងកិច្ចសហប្រតិបត្តិការសេដ្ឋកិច្ច និងអភិវឌ្ឍន៍ លោកស្រី Reem Alabali Radovan បាននិយាយថា ប្រទេសអាល្លឺម៉ង់ត្រៀមខ្លួនជាស្រេច ដើម្បីជួយស្ដារតំបន់ហ្កាហ្សាស្ទ្រីបឡើងវិញ នៅពេលដែលស្ថានភាពអនុញ្ញាតឲ្យធ្វើកិច្ចការបែបនេះបាន។

ទីភ្នាក់ងារសារព័ត៌មាន DPA បានដកស្រង់សម្តីលោកស្រីដែល បាននិយាយនៅក្នុងអំឡុងពេលបំពេញទស្សនកិច្ចទៅកាន់អេហ្ស៊ីបថា៖«អាល្លឺម៉ង់នឹងរួមចំណែកដល់ការស្ដារឡើងវិញនូវតំបន់ហ្កាហ្សាស្ទ្រីប»។ យោងតាមលោកស្រី ក្រសួងនឹងអាចជួយកែលម្អស្ថានភាពជាមួយនឹងការផ្គត់ផ្គង់ទឹក និងថាមពល និងការសាងសង់លំនៅឋាន ក្នុងតំបន់នេះ។

ជាមួយគ្នានេះ លោកស្រី បានសង្កត់ធ្ងន់ថា កិច្ចការស្តារឡើងវិញនេះ នឹងអាចកើតឡើងបានភ្លាមៗ នៅពេលដែលស្ថានការណ៍ជាក់ស្តែង ល្អប្រសើរឡើង។ ក្នុងចំណោមលក្ខខណ្ឌសម្រាប់ការងារនេះ ដែលលោកស្រីបានលើកឡើងអំពីបទឈប់បាញ់យូរអង្វែង នៅតំបន់ហ្កាហ្សា។

កាលពីថ្ងៃទី ០៦ ខែកក្កដា ក្រុមហាម៉ាស និងអ៊ីស្រាអែលជាមួយនឹងការសម្រុះសម្រួលដោយអេហ្ស៊ីប ប្រទេសកាតា និងសហរដ្ឋអាមេរិក បានបន្តដំណើរការចរចា នៅទីក្រុងដូហា ដោយមានគោលដៅ       សម្រេចបានកិច្ចព្រមព្រៀងស្តីពីបទឈប់បាញ់នៅតំបន់ហ្កាហ្សាស្ទ្រីប និងការដោះលែងចំណាប់ថ្នូរអ៊ីស្រាអែល ដែលឃុំខ្លួននៅក្នុងតំបន់នេះ។ ទីប្រឹក្សានាយករដ្ឋមន្ត្រីកាតា និងជាអ្នកនាំពាក្យក្រសួងការបរទេសកាតា លោក Majed bin Mohammed al-Ansari បាននិយាយកាលពីថ្ងៃទី ០៨ ខែកក្កដាថា អ្នកសម្រុះសម្រួលនៅឯការពិគ្រោះយោបល់នៅទីក្រុងដូហា (Doha) ស្តីពីការដោះស្រាយជម្លោះហ្កាហ្សា បន្តធ្វើការ ដើម្បីនាំយកជំហរនៃចលនាប៉ាឡេស្ទីនហាម៉ាស ដែលមានមូលដ្ឋាននៅតំបន់ហ្កាហ្សា និងអ៊ីស្រា   អែល ឲ្យកាន់តែជិតស្និទ្ធជាមួយគ្នា ដោយដំណើរការចរចា នៅតែបន្ត។ លោកបានបញ្ជាក់ថា វានឹងត្រូវការពេលវេលា ដើម្បីឈានដល់កិច្ចព្រមព្រៀងបទឈប់បាញ់។