ទីភ្នាក់ងារសារព័ត៌មានរដ្ឋ IRIB បានរាយការណ៍ថា យ៉ាងហោចណាស់មនុស្ស ១៨នាក់ បានរងរបួសកាលពីថ្ងៃអាទិត្យ នៅក្នុងការផ្ទុះឧស្ម័នដ៏ខ្លាំងក្លាមួយ នៅក្នុងអគារពាណិជ្ជកម្មមួយ ក្នុងទីក្រុង Rasht ភាគខាងជើងប្រទេសអ៊ីរ៉ង់។

លោក Shahram Momeni ប្រធាននាយកដ្ឋានពន្លត់អគ្គិភ័យនៅទីក្រុង Rasht ត្រូវបានដកស្រង់សម្តីដោយទីភ្នាក់ងារព័ត៌មាននិស្សិតអ៊ីរ៉ង់ថា បន្ទប់ចំនួន៣នៃអគារពាណិជ្ជកម្មនោះ ត្រូវរងការខូចខាត នៅក្នុងការផ្ទុះ ដែលបានកើតឡើង នៅផ្លូវ Bahonar ។ 

លោកបានបញ្ជាក់ថា អ្នករងរបួសទាំងអស់ក្នុងឧបទ្ទវហេតុនេះ ត្រូវបានបញ្ជូនទៅកាន់មណ្ឌលសុខភាព ដោយបន្ថែមថា ក្រុមប្រតិបត្តិការចំនួន ៦ ព្រមទាំងអ្នកពន្លត់អគ្គិភ័យ ក៏មានវត្តមាន នៅកន្លែងកើតហេតុដែរ។

លោក Momeni បាននិយាយថា ប្រតិបត្តិការយកកម្ទេចកម្ទី ត្រូវបានបញ្ចប់ ហើយគ្មាននរណាម្នាក់ ត្រូវបានរកឃើញជាប់ នៅក្រោមគំនរបាក់បែកនោះទេ ដោយសង្កត់ធ្ងន់ថា មូលហេតុចម្បងនៃឧបទ្ទវហេតុនេះ កំពុងស្ថិតក្រោមការស៊ើបអង្កេតនៅឡើយ។