សម្តេច ប៉ាប អេឡូទី១៤ (Leo XIV) បានថ្កោលទោស ចំពោះ «ភាពឃោរឃៅ» នៃសង្រ្គាម នៅតំបន់ហ្កាហ្សា កាលពីថ្ងៃអាទិត្យ (ទី២០ ខែកក្កដា) ហើយបានជំរុញកុំឲ្យ «ប្រើប្រាស់កម្លាំងដោយមិនមានគោលដៅជាក់លាក់» ដោយព្រះបន្ទូលនេះកើតមានឡើង ប៉ុន្មានថ្ងៃបន្ទាប់ពីវិហារកាតូលិកតែមួយគត់របស់ដែនដីនេះត្រូវបានបំផ្លាញដោយកងកម្លាំងការពារជាតិអ៊ីស្រាអែល ដែលបានប្រាប់ថា វាជាហេតុការណ៍ចៃដន្យ។

នៅចុងបញ្ចប់នៃពិធីអធិដ្ឋាន Angelus នៅប្រាសាទ Castel Gandolfo ដែលជាកន្លែងសម្រាកព្រះកាយនារដូវក្តៅរបស់សម្តេច ប៉ាប នៅក្បែរទីក្រុងរ៉ូម សម្ដេច ឡេអូ បានមានព្រះបន្ទូលថា៖ «ជាថ្មីម្តងទៀត ខ្ញុំសុំឲ្យបញ្ចប់ជាបន្ទាន់នូវភាពឃោរឃៅនៃសង្រ្គាមនេះ និងសុំឲ្យមានដំណោះស្រាយដោយសន្តិវិធី ចំពោះជម្លោះនេះ»។

ជាមួយគ្នានេះ សម្តេច ប៉ាប បានមានព្រះបន្ទូល អំពីការមាន «ទុក្ខព្រួយជាពន់ពេក» របស់ព្រះអង្គ ចំពោះការវាយប្រហារលើវិហារគ្រិស្តគ្រួសារបរិសុទ្ធ (Holy Family Church) កាលពីថ្ងៃព្រហស្បតិ៍សប្ដាហ៍កន្លងមក។

គួររំលឹកថា មនុស្ស ៣នាក់បានបាត់បង់ជីវិត និងជាច្រើននាក់បានរងរបួស ក្នុងនោះមានរួមទាំងបព្វជិតសហគមន៍កាតូលិកផងដែរ ក្នុងអំឡុងពេលការវាយប្រហារលើបរិវេណព្រះវិហារ ក្នុងទីក្រុងហ្កាហ្សា។ អ៊ីស្រាអែល បានប្រាប់ថា ខ្លួនកំពុងស៊ើបអង្កេតឧបទ្ទវហេតុនេះ។ កាលពីថ្ងៃសុក្រចុងសប្ដាហ៍កន្លងមក នាយករដ្ឋមន្ត្រី លោក Benjamin Netanyahu បានជជែកជាមួយជាមួយសម្ដេច ប៉ាប អស់រយៈពេលជាងមួយម៉ោង ហើយបានសម្តែងការសោកស្តាយ ចំពោះឧបទ្ទវហេតុនេះ ក៏ដូចជាចូលរួមរំលែកទុក្ខដល់គ្រួសារជនរងគ្រោះផងដែរ៕