លោកប្រធានាធិបតីអាមេរិក Donald Trump បានលើកឡើងពីការគាំទ្រយ៉ាងខ្លាំងក្លា ចំពោះរូបលោក នៅក្នុងគណបក្សសាធារណៈរដ្ឋ (GOP) កាលពីថ្ងៃអាទិត្យ (ទី២០ ខែកក្កដា) ដោយសរសេរនៅលើបណ្ដាញសង្គម Truth Social ថា ការស្ទង់មតិថ្មីៗ បង្ហាញឲ្យឃើញនូវការគាំទ្រពីសមាជិក GOP ដែលមានកម្រិតខ្ពស់រហូតដល់ ៩៥ភាគរយ។

ក្នុងប៉ុន្មានសប្តាហ៍ថ្មីៗនេះ លោក Trump បានធ្លាក់ចុះប្រជាប្រិយភាព ដោយអ្នកគាំទ្រមួយចំនួន ចាប់ផ្ដើមបង្ហាញការមិនសប្បាយចិត្ត ជុំវិញការដោះស្រាយរបស់រដ្ឋបាលរបស់លោកលើករណីរបស់លោក Jeffrey Epstein។ អ្នកគាំទ្រ ចំពោះគោលនយោបាយ «Make America Great Again» (MAGA) (ធ្វើឲ្យអាមេរិកអស្ចារ្យម្ដងទៀត) បានលើកឡើងពីការសន្យាពីមុនរបស់លោក Trump ក្នុងការបញ្ចេញឯកសារជាសាធារណៈ ដូចជា «បញ្ជីអតិថិជន» ជាដើម ក៏ដូចជាការអះអាងនៅមុននេះរបស់រដ្ឋមន្ត្រីក្រសួងយុត្តិធម៌ លោកស្រី Pam Bondi ដែលថា បញ្ជីស្ថិតនៅក្នុងការគ្រប់គ្រងរបស់លោកស្រី។

គួររំលឹកថា លោក Epstein ដែលត្រូវបានផ្ដន្ទាទោសពីបទល្មើសផ្លូវភេទ បានស្លាប់ដោយការធ្វើអត្តឃាតនៅក្នុងពន្ធនាគារញូវយ៉ក ក្នុងឆ្នាំ២០១៩ ខណៈពេលដែលកំពុងរង់ចាំការចោទប្រកាន់បន្ថែមទៀត ពីបទជួញដូរផ្លូវភេទ។ អ្នកហិរញ្ញវត្ថុដ៏អាម៉ាស់រូបនេះ មានទំនាក់ទំនងល្អជាមួយឥស្សរជនមានអំណាចជាច្រើន ហើយការស្លាប់របស់លោកបានជំរុញឲ្យមានការលើកឡើងនូវការឃុបឃិតគ្នាជាច្រើន ជាពិសេស ជុំវិញការចោទប្រកាន់នៃ «បញ្ជីអតិថិជន» និងអំពីរបៀបនៃការស្លាប់របស់លោក។

យ៉ាងណាក្ដី តាមរយៈការបង្ហោះលើបណ្ដាញសង្គម កាលពីថ្ងៃអាទិត្យ លោក Trump បានសរសេរថា៖ «កម្រិតប្រជាប្រិយភាពរបស់ខ្ញុំ នៅក្នុងរង្វង់គណបក្សសាធារណៈរដ្ឋ និងអ្នកគាំទ្រ MAGA បានកើនឡើងយ៉ាងខ្លាំង ចាប់តាំងពីរឿងរ៉ាវ ពាក់ព័ន្ធនឹងករណីរបស់លោក Jeffrey Epstein ត្រូវបានលាតត្រដាង ដោយវាគ្រាន់តែជាការប្រឌិដ្ឋឡើងពីក្រុមប្រជាធិបតេយ្យឆ្វេងនិយមជ្រុល និងក្រុមបង្កបញ្ហាប៉ុណ្ណោះ»៕