ក្រុមហាម៉ាសប៉ាឡេស្ទីនដែលមានមូលដ្ឋាននៅហ្កាហ្សា បាននិយាយនៅក្នុងសេចក្តីថ្លែងការណ៍មួយនៅលើបណ្តាញ Telegram របស់ខ្លួនថា ប្រជាជននៅតំបន់មហ្កាហ្សាជាងពីរលាននាក់ អាចស្លាប់ ដោយសារភាពស្រេកឃ្លាន ដោយសារតែការបន្តបិទផ្លូវរបស់អ៊ីស្រាអែលនៅតំបន់ដែលកំពុងត្រូវបានវាយប្រហារ នេះ។

សេចក្តីថ្លែងការណ៍ បានបញ្ចាក់ថា៖«មនុស្សជាងពីរលាននាក់ ដែលកំពុងអត់អាហារបរិភោគ នៅតំបន់ហ្កាហ្សាអាចស្លាប់ដោយការអត់ឃ្លាន ជាមួយនឹងកុមារជាង ៦៥០.000នាក់ រងទុក្ខដោយសារកង្វះអាហារូបត្ថម្ភធ្ងន់ធ្ងរ»។

នាពេលមុននេះ ចលនានេះ បានចោទប្រកាន់អ៊ីស្រាអែលថា បានប្រើប្រាស់បង្អត់អាហារ និងការដកហូតនៃសម្ភារៈចំបាច៉ការជាមូលដ្ឋានប្រឆាំងនឹងអ្នករស់នៅតំបន់ហ្កាហ្សា ជាមធ្យោបាយនៃការប្រល័យពូជសាសន៍ ហើយបានអំពាវនាវឲ្យសហគមន៍អន្តរជាតិ ចាត់វិធានការជាបន្ទាន់ ដើម្បីបញ្ចប់ការបិទផ្លូវរបស់   អ៊ីស្រាអែលលើតំបន់ហ្កាហ្សា ដែលបានធ្វើឡើងអស់រយៈពេលជាង ២១ខែហើយនោះ។

អ្នកនាំពាក្យកងកម្លាំងការពារអ៊ីស្រាអែល (IDF) លោក Avichay Adraee បានបដិសេធការចោទប្រកាន់របស់ក្រុមហាម៉ាស ដោយអះអាងថា ដោយប្រើប្រព័ន្ធផ្សព្វផ្សាយ ក្រុមសកម្មប្រយុទ្ធ «កំពុងផ្សព្វផ្សាយការភូតកុហក ដើម្បីជួយសង្គ្រោះអ្វីដែលនៅសេសសល់ដែលក្រុមហាម៉ាសបានកាន់កាប់»។