យន្តហោះ Airbus A320 របស់ក្រុមហ៊ុនអាកាសចរណ៍ Air India បានរអិសធ្លាក់ចេញពីផ្លូវរត់ ខណៈដែលកំពុងចុះចតពេលមានភ្លៀងធ្លាក់ខ្លាំង នៅឯអាកាសយានដ្ឋានអន្តរជាតិ Mumbai របស់ប្រទេសឥណ្ឌា នាថ្ងៃចន្ទ (ទី២១ ខែកក្កដា) នេះ ដោយបាននាំឲ្យផ្លូវរត់ត្រូវបិទរយៈពេលខ្លី និងធ្វើឲ្យខូចខាតផ្នែកខាងក្រោមនៃម៉ាស៊ីនយន្តហោះ។

ក្រុមហ៊ុនអាកាសចរណ៍ Air India បានឲ្យដឹងថា តាំងពីពេលនោះមក អ្នកដំណើរ និងបុគ្គលិកអាកាសយានិកទាំងអស់ បានចុះពីយន្តហោះ ដោយមិនបានបញ្ជាក់ថា តើមានអ្នករងរបួសដែរ ឬអត់។ ជើងហោះហើរ AI2744 បានហោះហើរពីទីក្រុង Kochi ភាគខាងត្បូងរដ្ឋ Kerala ទៅកាន់ទីក្រុង Mumbai។

អាកាសយានដ្ឋាន Mumbai បានឲ្យដឹងនៅក្នុងសេចក្តីថ្លែងការណ៍មួយថា មាន «ការខូចខាតតិចតួចដែលត្រូវបានរាយការណ៍ នៅលើផ្លូវរត់សំខាន់ទី១ របស់អាកាសយានដ្ឋាន» ដោយសារតែអ្វីដែលវាត្រូវបានពិពណ៌នាថា ជា «យន្តហោះរអិលចេញពីផ្លូវរត់» ហើយផ្លូវរត់ទី២ ត្រូវបានដាក់ឲ្យដំណើរការ ដើម្បីធានាដល់ការបន្តប្រតិបត្តិការ។ 

ក្រុមហ៊ុន Air India បន្ថែមថា យន្តហោះនេះត្រូវបានចុះចត ដើម្បីត្រួតពិនិត្យ។ សេចក្ដីរាយការណ៍ពីសារព័ត៌មាន Times of India ដែលដកស្រង់ប្រភពនានា បានឲ្យដឹងថា សំបកកង់យន្តហោះចំនួន ៣ បានផ្ទុះភ្លាមៗ បន្ទាប់ពីចុះចត។

គួរដឹងថា ក្រុមហ៊ុនអាកាសចរណ៍ Air India បានស្ថិតនៅក្រោមការត្រួតពិនិត្យតាមដានយ៉ាងតឹងរ៉ឹង បន្ទាប់ពីយន្តហោះ Boeing 787 បានធ្លាក់នៅទីក្រុង Ahmedabad របស់ប្រទេសឥណ្ឌា កាលពីខែមិថុនា ដោយបានសម្លាប់មនុស្ស ២៦០នាក់៕