​រុស្ស៊ី៖ ទីភ្នាក់ងារសារព័ត៌មាន​រុស្ស៊ី​បាន​រាយការណ៍​ថា អនុរដ្ឋមន្ត្រី​ក្រសួងការបរទេស​រុស្ស៊ីលោក Sergei Ryabkov បាន​ប្រាប់​ក្រុម​អ្នកសារព័ត៌មាន​ថា ​ការ​កិច្ចចរចា​ដំបូង​ជាមួយ​អ្នកការទូត​ជាន់ខ្ពស់​សហរដ្ឋអាមេរិក ​នៅក្នុង​ទីក្រុង​ហ្សឺ​ណែវ​កាលពី​ល្ងាច​ថ្ងៃអាទិត្យ ៩ មករា នៅមុនថ្ងៃ​នៃ​កិច្ចប្រជុំ​ដ៏​សំខាន់​មួយ​គឺមាន​ភាព "​ស្មុគស្មាញ" ប៉ុន្តែ​ការពិភាក្សា​ដូចជា​ការចរចា​ពី​ជំនួញ​។​

​ក្រុម​អ្នកការទូត​របស់​ប្រទេស​រុស្ស៊ី និង​សហរដ្ឋអាមេរិកគ្រោង​នឹង​ជួបពិភាក្សា​គ្នា​នៅក្នុង​ទីក្រុង​របស់ប្រទេស​ស្វី​សនៅ​ថ្ងៃ​ចន្ទ​នេះ ស្រប​ពេលមាន​ក្ដី​បារម្ភ​ជុំវិញ​ការបង្កើន​កម្លាំង​កងក​ទ័ព​រុស្ស៊ីជិត​អ៊ុយ​ក្រែ​ន។ ទីក្រុង​មូ​ស្គូ​កំពុង​រំពឹង​ថា​នឹង​ទទួលបាន​ការធានា​សន្តិសុខ​ពី​ប្រទេស​លោកខាងលិច​។​ ​សារព័ត៌មាន Interfax បាន​ដក​ស្រង់សម្ដី​របស់លោក Ryabkov ដោយនិយាយ​បន្ទាប់ពី​ការទាក់ទង​ដំបូង​របស់​លោក​ ជាមួយ​អនុរដ្ឋមន្ត្រី​ការបរទេស​អាមេរិក​លោកស្រី Wendy Sherman មុនពេល​ជំនួប​ជា​ផ្លូវការ​នៅ​ថ្ងៃ​ចន្ទ​នេះ​ថា ការសន្ទនា​មានការ​ស្មុគស្មាញ វា​ពិតជា​មិន​ងាយស្រួល​នោះទេ។ ​ការពិភាក្សា​នេះ​ដូចជា​គោលការណ៍​នៃ​ការចរចា​ពី​ជំនួញ​។ លោក​គិត​ថា ពួក​លោក​នឹង​ខ្ជះខ្ជាយ​ពេលវេលា​សម្រាប់​​ការពិភាក្សា​ដែល​គ្មាន​លទ្ធផល​នៅ​ថ្ងៃនេះ​។

​កាលពី​ថ្ងៃអាទិត្យ​នោះដែរ ប្រមុខ​ការទូត​អាមេរិក​លោក Antony Blinken​ បាន​និយាយ​ចំៗ​ថា លោក​មិន​រំពឹង​ថា​នឹង​មាន​របកគំហើញ​ណា​មួយ​នៅ​ក្នុង​សប្តាហ៍​ខាងមុខនេះ​ទេ​។​ ផ្ទុយទៅវិញលោក​ថា លទ្ធផល​វិជ្ជមាន​បន្ថែម​ទៀតទំនងជា​នឹង​ជា​កិច្ចព្រមព្រៀងបន្ធូរបន្ថយ​ភាព​តាន​តឹង​ក្នុង​រយៈពេល​ខ្លី និង​ការ​វិល​ទៅ​រក​ការចរចា​នៅ​ពេល​វេលា​សមស្រប​ណាមួយ ​នា​ពេល​អនាគត​ជុំវិញ​វិបត្តិ​អ៊ុយ​ក្រែ​ន​៕

អត្ថបទ៖ សុខមាន