បើតាមទីភ្នាក់ងារពន្លត់អគ្គិភ័យ បានឲ្យដឹងថា យ៉ាងហោចណាស់មនុស្ស ១៩នាក់ បានបាត់បង់ជីវិត ដោយសារយន្តហោះហ្វឹកហ្វឺនរបស់កងទ័ពអាកាសបង់ក្លាដែស បានធ្លាក់ចូលទៅក្នុងបរិវេណមហាវិទ្យាល័យ និងសាលារៀន នៅក្នុងទីក្រុងដាកា នាថ្ងៃចន្ទ (ទី២១ ខែកក្កដា) នេះ។

ជាមួយគ្នានេះ ក្រុមគ្រូពេទ្យបានប្រាប់អ្នកសារព័ត៌មានថា មនុស្សជាង ៥០នាក់ ក្នុងនោះរួមមានទាំងកុមារ និងមនុស្សពេញវ័យផងដែរ ត្រូវបានបញ្ជូនទៅមន្ទីរពេទ្យ ដោយមានអាការរលាក។

ក្រុមមន្ត្រី បានប្រាប់ថា ឧបទ្ទវហេតុនេះ បានកើតឡើងនៅសាលា និងមហាវិទ្យាល័យ Milestone ក្នុងតំបន់ភាគខាងជើង Uttara នៃទីក្រុងដាកា។ នាយកដ្ឋានទំនាក់ទំនងសាធារណៈរបស់យោធា បានឲ្យដឹងនៅក្នុងសេចក្តីថ្លែងការណ៍មួយថា៖ «យន្តហោះហ្វឹកហ្វឺន F-7 BGI របស់កងទ័ពអាកាសបង់ក្លាដែសបានធ្លាក់ នៅតំបន់ Uttara។ យន្តហោះបានហោះឡើងនៅម៉ោង ១:០៦រសៀល ម៉ោងក្នុងស្រុក»។

រូបភាពវីដេអូក្រោយឧបទ្ទវហេតុធ្លាក់យន្តហោះនោះ បានបង្ហាញឲ្យឃើញអគ្គិភ័យដ៏ធំមួយ នៅក្បែរវាលស្មៅ ដោយសំណុំផ្សែងយ៉ាងក្រាស់ហុយទ្រលោមទៅលើមេឃ ខណៈដែលហ្វូងមនុស្សនាំគ្នាឈរមើលពីចម្ងាយ។

រូបភាពពីទូរទស្សន៍ Reuters បានបង្ហាញថា ក្រុមអ្នកពន្លត់អគ្គិភ័យបានបាញ់ទឹកទៅលើបំណែកយន្តហោះ ដែលទំនងជាបានធ្លាក់ចូលទៅក្នុងផ្នែកម្ខាងនៃអគារមួយ៕