មន្ត្រីជាន់ខ្ពស់ ក្នុងតំបន់ នៅថ្ងៃចន្ទ (ទី២១ ខែកក្កដា) នេះ បានប្រាប់ឲ្យដឹងថា យ៉ាងហោចណាស់ទាហានប៉ាគីស្ថានចំនួន ៨នាក់ និងសមាជិកក្រុមសកម្មប្រយុទ្ធ ៤នាក់ ត្រូវបានសម្លាប់ អំឡុងការប៉ះទង្គិចគ្នាមួយ នៅភាគពាយព្យនៃប្រទេស ជាអំពើហិង្សាចុងក្រោយបំផុតដែលបានកើតមាននៅតំបន់ដ៏ច្របូកច្របល់នេះ។

មន្ត្រីសន្តិសុខជាន់ខ្ពស់ម្នាក់ ក្នុងតំបន់ បានប្រាប់សារព័ត៌មាន AFP ថា៖ «ពួកភេរវករប្រដាប់អាវុធ បានវាយប្រហារក្បួនរថយន្តអង្គភាព Frontier Corps (FC) ដោយប្រើអាវុធធុនធ្ងន់ ហើយការប្រយុទ្ធគ្នា បានបន្តអស់រយៈពេលជាច្រើនម៉ោង»។

លោកបានបញ្ជាក់ថា៖ «បុគ្គលិកអង្គភាព FC ៨នាក់ ត្រូវបានសម្លាប់ ហើយ ១១នាក់ទៀត បានរងរបួស»។ លោកបានបន្ថែមថា ទាហាន ៣នាក់ដែលរងរបួស ស្ថិតក្នុងស្ថានភាពធ្ងន់ធ្ងរ ខណៈការប៉ះទង្គិចនេះ ក៏បានបណ្ដាលឲ្យសមាជិកក្រុមសកម្មប្រយុទ្ធ ៤នាក់ស្លាប់ផងដែរ។

គួរបញ្ជាក់ថា ប្រទេសប៉ាគីស្ថានបានឃើញការកើនឡើងយ៉ាងខ្លាំងនូវអំពើហិង្សា នៅក្នុងតំបន់របស់ខ្លួន ជាប់ព្រំដែនអាហ្វហ្គានីស្ថាន ចាប់តាំងពីក្រុមតាលីបង់ បានវិលត្រលប់ទៅកាន់អំណាច នៅទីក្រុងកាប៊ុលក្នុងឆ្នាំ២០២១។ ទីក្រុងអ៊ីស្លាម៉ាបាដ បានចោទប្រកាន់ប្រទេសជិតខាងភាគខាងលិចរបស់ខ្លួនថា បានអនុញ្ញាតឲ្យមានការប្រើប្រាស់ដែនដីរបស់ខ្លួន ដើម្បីវាយប្រហារប្រឆាំងនឹងប៉ាគីស្ថាន ជាការអះអាងដែលក្រុមតាលីបង់បានបដិសេធ៕