ទីក្រុងតេអេរ៉ង់ នៅថ្ងៃចន្ទ (ទី២១ ខែកក្កដា) នេះ បានបញ្ជាក់ថា មហាអំណាចអឺរ៉ុប គឺជាអ្នកធ្វើឲ្យកិច្ចព្រមព្រៀងនុយក្លេអ៊ែរឆ្នាំ២០១៥ ដួលរលំ ដោយចោទប្រកាន់ថា ប្រទេសទាំងនោះ បានបំពានការប្តេជ្ញាចិត្តរបស់ពួកគេ ដោយការលើកឡើងនេះកើតមានមុនចាប់ផ្ដើមកិច្ចចរចាជាថ្មី នៅទីក្រុងអ៊ីស្តង់ប៊ុល ប្រទេសទួរគី ជាមួយចក្រភពអង់គ្លេស បារាំង និងអាល្លឺម៉ង់។

គួររំលឹកថា កិច្ចព្រមព្រៀងឆ្នាំ២០១៥ ដែលសម្រេចបាន រវាងអ៊ីរ៉ង់ និងប្រទេសសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ដូចជាអង់គ្លេស ចិន បារាំង រុស្ស៊ី និងសហរដ្ឋអាមេរិក បូករួមទាំងអាល្លឺម៉ង់ផង បានដាក់ចេញនូវការទប់ស្កាត់កម្មវិធីនុយក្លេអ៊ែររបស់អ៊ីរ៉ង់ ជាថ្នូរនឹងការបន្ធូរបន្ថយទណ្ឌកម្ម។

ប៉ុន្តែវាបានចាបផ្ដើមជួបបញ្ហានៅក្នុងឆ្នាំ២០១៨ នៅពេលដែលសហរដ្ឋអាមេរិក ក្នុងអំឡុងពេលអាណត្តិទី១ របស់លោក Donald Trump ជាប្រធានាធិបតី បានដកខ្លួនជាឯកតោភាគីចេញពីកិច្ចព្រមព្រៀងនេះ និងដាក់ទណ្ឌកម្មឡើងវិញ។

បណ្ដាប្រទេសអឺរ៉ុបបានសន្យាបន្តគាំទ្រ ចំពោះកិច្ចព្រមព្រៀងនេះ ប៉ុន្តែយន្តការដែលមានបំណងប៉ះប៉ូវទណ្ឌកម្មរបស់អាមេរិកមិនដែលមានប្រសិទ្ធភាពសោះឡើយ ហើយក្រុមហ៊ុនលោកខាងលិចជាច្រើន ត្រូវបានបង្ខំចាកចេញពីប្រទេសអ៊ីរ៉ង់ ដែលចាប់តាំងពីពេលនោះមក បានប្រឈមមុខនឹងវិបត្តិសេដ្ឋកិច្ចកាន់តែធ្ងន់ធ្ងរ។

អ្នកនាំពាក្យក្រសួងការបរទេសអ៊ីរ៉ង់ លោក Esmail Baqaei បាននិយាយថា៖ «ភាគីអឺរ៉ុបមានកំហុស និងធ្វេសប្រហែស ក្នុងការអនុវត្តកិច្ចព្រមព្រៀងនុយក្លេអ៊ែរនេះ»។

ការកត់សម្គាល់របស់លោក Baqaei ធ្វើឡើងនៅមុនកិច្ចប្រជុំ នាថ្ងៃសុក្រនៅទីក្រុងអ៊ីស្តង់ប៊ុល រវាងមន្ត្រីអ៊ីរ៉ង់ និងតំណាងមកពីចក្រភពអង់គ្លេស បារាំង និងអាល្លឺម៉ង់ ដើម្បីពិភាក្សាអំពីអនាគតនៃកិច្ចព្រមព្រៀងនុយក្លេអ៊ែរ៕